Baıqońyrdan Halyqaralyq ǵarysh stantsııasyna júk jiberý 11 qyrkúıekke josparlanǵan

ASTANA. KAZINFORM — «Baıqońyr» ǵarysh aılaǵynda «Progress MS-32» júk tasymaldaý kemesin Halyqaralyq ǵarysh stantsııasyna (HǴS) ushyrýǵa daıyndyq jumystary júrip jatyr, dep habarlaıdy Kazinform tilshisi.

Ushý aldyndaǵy daıyndyq josparyna sáıkes «Energııa» korporatsııasynyń mamandary «Progress MS-32» kemesine janarmaı quıdy.

— Ǵarysh kemesin toltyrý — tsısternalardyń salmaǵyn teńestirýge bolatyn sońǵy kezeń, bul ushý kezinde júk kóligi teńgeriminiń dáldigin arttyrady, — deıdi mamandar.

Janarmaı quıylǵannan keıin júk kóligi odan ári daıyndyq úshin 254-shi ǵarysh aılaǵy ýchaskesine qaıtaryldy. Ushyrylymǵa úsh kún qalǵanda, 8 qyrkúıekte «Progress MS-32» júk kóligi «Soıýz 2.1a» zymyran-tasymaldaǵyshymen «Baıqońyr» ǵarysh aılaǵy ýchaskesiniń № 31 ushyrý alańyna ornatylady.

93-shi HǴS jetkizý mıssııasynyń baǵdarlamasy boıynsha «Progress MS-32» júk kemesi men «Soıýz-2.1a» zymyran tasymaldaǵyshyn ushyrý 2025 jyldyń 11 qyrkúıegine, Astana ýaqytymen saǵat 20:49–ǵa josparlanǵan.

Aldaǵy ushyrylym «Progress» serııaly ǵarysh apparatynyń bıylǵy 185-shi jáne «Baıqońyr» ǵarysh aılaǵynan besinshi ushýy bolady.

Baıqońyrdan buǵan deıingi ushyrý 2025 jyldyń 20 tamyzynda júzege asyryldy. Onda № 2 Bıon-M bıologııalyq zerthanasy tiri tirshilik ıelerimen birge ǵaryshqa jiberilgen bolatyn.

Týrızm jáne sport vıtse-mınıstri Erjan Erkinbaev Baıqońyrdaǵy árbir zymyran ushyrylymyna 2 myńnan astam týrıst keletinin aıtqan edi.