Baıqońyrdaǵy árbir zymyran ushyrylymyna 2 myńnan astam týrıst keledi – vıtse-mınıstr
ASTANA. KAZINFORM – Baıqońyr ǵarysh aılaǵynda týrızmdi damytý jospary týraly Týrızm jáne sport vıtse-mınıstri Erjan Erkinbaev aıtyp berdi.
- Búgin zymyran ushyrylymy ótti. Árbir zymyran ushyrylymyna 2 myńnan astam týrıst keledi. Barshaǵa málim, Baıqońyr ǵarysh aılaǵynyń aýmaǵy Reseı Federatsııasynyń basqarýynda. Zymyran ushyrylymyna keletin barlyq týrıst arnaıy qaýipsizdik rásimderinen ótedi, jalpy jylyna on shaqty ushyrylym bolady. Baıqońyr ǵarysh aılaǵy men jalpy atalǵan óńir úshin basty másele – jatyn oryndardyń jetkiliksizdigi. Sondyqtan zymyran ushyrylymy kezinde barlyq qonaq úı lyq tolady. Tipti qonaqúılerdiń kóbin zymyrandy ushyrýǵa qatysatyn tehnıkalyq qyzmetkerler ıelenedi, - dedi Erjan Erkinbaev Úkimet otyrysynan keıin ótken baspasóz máslıhatynda.
Osylaısha Baıqońyr qalasynda týrısterge az oryn qalady.
- Bul máselege qatysty naqty jospar bar. Biz zymyrandar ushyrylmaıtyn aralyq kezeńdi de týrızmge aınaldyrǵymyz keledi, sebebi sol kezeńniń nysandary týrıster úshin erekshe astrofızıkalyq qundylyqqa ıe. Onyń ishinde balalar men jasóspirimderge arnalǵan týrızmdi damytýǵa bolady, óıtkeni qazaq halqy úshin ǵarysh salasy men astrofızıka tarıhı turǵydan jaqyn. Osyndaı biregeı ǵarysh aılaǵynyń bizdiń jerimizde ornalasýy, sózsiz týrızm úshin óte qundy nysan, - deıdi ol.
Aıta ketsek, búgin Astana ýaqyty boıynsha saǵat 10:47-de «Baıqońyr» ǵarysh aılaǵynyń 31-shi alańynan «Soıýz MS-27» basqarylatyn kólik ǵarysh kemesi bar «Soıýz 2.1» zymyran tasyǵyshynyń ushyrylymy ótti.
Baıqońyrdan tikeleı reportaj júrgizýshilerdiń aıtýynsha, ǵaryshkerler ózderin jaqsy sezinedi. Baıqońyrdan aldaǵy ushyrý Uly Jeńistiń 80 jyldyǵyna arnalady.