Baıqońyrda reseılik baǵdarlama boıynsha oqyǵan túlekter UBT-ǵa qatysa ala ma
QYZYLORDA. KAZINFORM — Qazirgi kúni Baıqońyr qalasynda 11 mektep bar. Onyń 6-y qazaqstandyq bilim berý standarty boıynsha oqytady.
Qyzylorda oblysy ákiminiń orynbasary, QR Prezıdentiniń «Baıqońyr» keshenindegi arnaýly ókili Qaırat Nurtaıdyń aıtýynsha, qaladaǵy barlyq mektepte 7 390 oqýshy bilim alyp júr.
2 484 bala Reseı Federatsııasynyń mektepterinde oqıdy, onyń 698-i — Qazaqstan Respýblıkasynyń azamattary. Al qazaqstandyq mektepterde bilim alýshylar sany — 4 906.
Osy oraıda «Kórshi eldiń bilim baǵdarlamasymen oqyǵan otandastarymyz UBT-ǵa esh qıyndyqsyz qatysa ala ma?» degen suraq týyndaıdy. Qaırat Nurtaı Kazinform tilshisine túlekterdiń test tapsyrýyna esh kedergi joq ekenin aıtty.
— Reseılik standartqa saı bilim alǵan qazaqstandyq mektep túlekteri UBT-ǵa qalaýynsha qatysa alady. 2023 jylǵy Úkimetaralyq sheshimmen eki eldiń mınıstrligi kelisimge kelgen edi. Kelisim barysynda Qazaqstan tarıhy, qazaq tili men qazaq ádebıetin qosymsha pán retinde ótý týraly usynys maquldandy. Mektep bitiretin balalar bul pánderdi qajetine qaraı meńgeredi, ıaǵnı olarǵa tańdaý erkindigi berilgen, — dedi ol.
Eske salaıyq, munyń aldynda Qyzylorda oblysy ákiminiń orynbasary, QR Prezıdentiniń «Baıqońyr» keshenindegi arnaýly ókili Qaırat Nurtaı Kazinform tilshisiniń «Jaqyn arada ǵaryshqa Qazaqstan azamaty ushýy múmkin be?» degen suraǵyna jaýap bergen edi.
