Baıqońyrda qurylysy aıaqsyz qalǵan 5 turǵyn úıdiń merdigeri aýysty

QYZYLORDA. KAZINFORM – Baıqońyr qalasynda qurylysy mejeli merzimde bitpegen turǵyn úılerde jumys qaıtadan jandandy. Bul týraly Qarmaqshy aýdany ákiminiń baspasóz qyzmeti habarlady.

Juldyzdy qalashyqta 50 páterli 5 baspana salynyp jatyr. Jalpy quny 3,7 mlrd teńge bolatyn joba boıynsha 2021-2023 jyldar aralyǵynda 2,8 mlrd teńge qarjy ıgerilgen.

– Qurylys belgilengen merzimde aıaqtalmaǵandyqtan merdiger mekemelermen aradaǵy kelisimshart sot tártibimen buzyldy. Merdigerler sot sheshimimen avanstyq tólemderdi memleket bıýdjetine qaıtardy. Osyǵan baılanysty 2025 jyly joba qaıtadan qaralyp, smetalyq qujattamaǵa túzetý engizildi. Soǵan sáıkes qurylystyń jalpy quny ózgerdi. Turǵyn úıler qurylysyn aıaqtaý maqsatynda memlekettik satyp alý konkýrsy jarııalanyp, nátıjesinde «Aman qurylys» JShS merdiger boldy. Kompanııamen kelisimshart jasaldy. Bıyl bólingen qarajat esebinen alǵashqy avanstyq tólem berilip, jumys qaıtadan bastaldy, - delingen habarlamada. 

Qurylys jańa merdigerdiń jobasyna sáıkes jalǵasyp jatyr, ol aıaqtalǵan soń páterler el azamattaryna kezektilikpen tapsyrylmaq. 

Aıta keteıik, turǵyn úı máselesin sheshý úshin Qazaqstan qarajaty esebinen Baıqońyr qalasynyń 7 A shaǵyn aýdanynda «Nurly jer» baǵdarlamasy aıasynda 50 páterli 5 kópqabatty úı salynyp jatyr.