Baıqońyrda kólik qaqqan jaıaý áıel kóz jumdy

«Baıqońyr» kesheni prokýratýrasy jaıaý júrginshiniń ólimine ákelgen jol-kólik oqıǵasy boıynsha qylmystyq is qozǵady, dep habarlaıdy Kazinform tilshisi.

«Kia Cerato» avtokóliginiń 35 jastaǵy júrgizýshisi Baıqońyr qalasy 6-yqshamaýdandaǵy Gagarın kóshesi boıymen kele jatyp, jaıaý júrginshiler jolymen ótip bara jatqan azamatty qaǵyp ketti.

Qatty jyldamdyqpen áıeldi qaǵyp ketken sát kóshedegi beınebaqylaý kamerasyna túsip qalǵan.

Apat saldarynan ómirine qaýip tónerlik aýyr jaraqat alǵan jaıaý júrginshi aýrýhanaǵa jetkizildi.

Keıinirek ol otadan keıin komada bolyp, qaıtys bolǵany belgili boldy. Oqıǵanyń jaı-japsaryn anyqtaý úshin tergeý amaldary júrip jatyr.

Tergeý kezinde jol-kólik oqıǵasyna kináli tulǵanyń áreketine qylmystyq-quqyqtyq baǵa beriledi.

Іsti tergeý barysy erekshe baqylaýǵa alyndy, dep atap ótti «Baıqońyr» kesheni prokýratýrasy.

Ókinishke qaraı, mundaı jaǵdaı Baıqońyrda birinshi ret bolyp turǵan joq.

Eki apta buryn ǵana kólik júrgizýshi jolaýshymen áńgimege alańdap, jaıaý júrginshiler joly arqyly ótip bara jatqan eki azamatty qaǵyp ketken bolatyn.

Ekeýi de aýyr jaraqat aldy.

Keıingi kezderi qala aýmaǵynda osyndaı oqıǵa jıilep ketkendikten keshen prokýrory Aleksandr Trıfonov barlyq múddeli qurylymnyń qatysýymen vedomstvoaralyq jınalys ótkizý jóninde sheshim qabyldady.