Baıqońyrda qazaqstandyq taǵy eki balabaqsha ashyldy

Baıqońyr qalasynda Qazaqstannyń bilim standarttarymen jumys isteıtin bóbekjaılar sany artyp keledi. Kúni keshe munda taǵy eki balabaqsha ashylyp, el ıgiligine berildi. Bul týraly QR Prezıdentiniń Baıqońyr keshenindegi arnaýly ókili Qaırat Nurtaı málim etti, dep jazady Qyzylordatv.

Baıqońyr qalasynda qazir bas-aıaǵy 16 balabaqsha bar. Onyń úsheýi qazaqstandyq bilim standartymen jumys jasaıdy. Olardyń qatary kúrdeli jóndeýden ótken taǵy 2 balabaqshamen tolyqty. Onyń bireýi 240 orynǵa arnalǵan memlekettik balabaqsha bolsa, ekinshisi 120 orynǵa josparlanǵan jeke balabaqsha.

«Qazir Reseı tarapynda bolǵan Baıqońyr qalasyndaǵy balabaqshalardy Qazaqstan balansyna alyp, elimizdiń bilim standartyna sáıkes oqytýǵa múmkinshilik týyp otyr. Bul jumystar ári qaraı jalǵasady. Osylaısha jyl sońyna deıin mektepke deıingi uıymdarǵa kezek máselesi sheshiledi», - dedi Qaırat Nurtaı.

Aıtýynsha, bıylǵy jyldyń ortasyna deıin taǵy bir balabaqsha qazaqstandyq bilim standartyna ótedi.