Baıqońyrda «ǵaryshtyq» sýburqaq iske qosyldy

BAIQOŃYR. KAZINFORM – Baıqońyr qalasynda turǵyndar men qonaqtarǵa arnalǵan jańa demalys orny ashyldy. Qalanyń ortalyq alańynda tarıhta alǵash ret sýburqaq jumysyn bastady.

Jańa nysannyń ereksheligi – sýburqaq tek áýen men jaryqpen úılesken sý oıyny emes, ol taqyryptyq sıpatqa ıe. Sý aǵyndary kókke shapshyp kóterilgen sátte alań ústinde ıÝrıı Gagarınniń áıgili «Poehalı!» daýysy estiledi, artynsha Levıtannyń tuńǵysh ǵaryshkerdiń ushqany týraly habarlamasy beriledi, sońynan «Trava ý doma» áni shyrqalady.

Sýburqaqty  reseılik jáne qazaqstandyq merdiger kompanııalar birlese salǵan. Qazir ár kesh saıyn alańda turǵyndar men qala qonaqtary jınalyp, salqyndap, erekshe mýzykalyq baǵdarlamaǵa kýá bolady.

– Jaz bizde uzaq ári ystyq bolady. Osyndaı ásem de úlken fontannyń ortalyq alańnan oryn alýy, onyń ústine ǵaryshtyq baǵdarlamaǵa baılanysty bezendirilýi bizdi qýantty. Endi kezdesip, serýendeıtin súıikti ornymyz bar, – deıdi baıqońyrlyqtar.

Qala ákimdiginen atap ótkendeı, bul joba «Ómir súrýge qolaıly ınfraqurylym» ulttyq jobasy aıasyndaǵy «Qolaıly qalalyq ortany qalyptastyrý» federaldyq baǵdarlamasy boıynsha júzege asyryldy.

Sońǵy ýaqytta Baıqońyrǵa saıahat uıymdastyratyn týrıstik agenttikter jańa nysandy ekskýrsııalyq baǵdarlamaǵa qosýǵa daıyn ekenin málimdedi. Sebebi basty alańda qonaqtardy qabyldaıtyn «Ortalyq» qonaqúıi ornalasqan.

Al baıqońyrlyqtar qazirdiń ózinde fontandy qus ushatyn bıiktikten ádemi beınege túsirip, áleýmettik jelilerde bólisip jatyr.

Buǵan deıin Baıqońyr qalasynyń 70 jyldyǵynda ashyq aspan astyndaǵy murajaıdyń ashylǵany habarlanǵan bolatyn.