Baıqońyrda 6 adam ataýly áleýmettik kómek alý úshin tabysyn jasyrǵan
ASTANA. KAZINFORM — Baıqońyr qalasynda ataýly áleýmettik kómek (AÁK) taǵaıyndaý kezinde zań buzýshylyqtar anyqtaldy. Tekserý nátıjesinde tabysyn jasyrǵan 6 adamǵa bıýdjetten zańsyz 2,6 mln teńge tólengen.
Baıqońyr qalasynyń prokýratýrasy AÁK taǵaıyndaý kezinde zań talaptarynyń saqtalýyna taldaý júrgizgen.
Tekserý barysynda alty azamattyń tabysyn jasyrǵany anyqtalǵan. Sonyń saldarynan olarǵa memlekettik bıýdjet qarajaty esebinen jalpy somasy 2,6 mln teńge kóleminde ataýly áleýmettik kómek artyq tólengen.
— Prokýrorlyq qadaǵalaý aktisi negizinde zań buzýshylyqtar joıyldy. Qazirdiń ózinde eki azamattan memleket bıýdjetine 553 233 teńge óndirildi, — delingen habarlamada.
Qalǵan tulǵalardan artyq tólengen qarajatty óndirip alý máselesi sot tártibimen qaralyp jatyr.
Eske salaıyq, buǵan deıin Almatydan Aqtaýǵa ońaı tabys izdep kelgen qyz 7 jylǵa sottalǵanyn habarlaǵan edik.
