«Baıqońyr» kesheniniń 69 avtokóligi jalǵa berýden shyǵarylady
ASTANA. KAZINFORM – «Baıqońyr» kesheniniń 69 avtokólik quralyn jalǵa berýden shyǵarý máselesi pysyqtalyp jatyr. Bul týraly Májilis depýtattarynyń saýalyna P remer-Mınıstr Oljas Bektenovtiń jaýabynda aıtylǵan.
- Búginde ýákiletti organdar «Baıqońyr» kesheniniń 69 birlik kóleminde avtokólik quraldaryn jalǵa berýden shyǵarý máselesin pysyqtap jatqanyn habarlaımyz. Osy kólik quraldaryn tirkeý qoldanystaǵy zańnamanyń talaptaryna sáıkes júzege asyrylatyn bolady, - dedi Premer-Mınıstr jaýabynda.
Úkimet basshysynyń atap ótýinshe, 2018 jyly «Báıterek» ǵaryshtyq zymyran keshenin qurý jónindegi jobany iske asyrý úshin «Zenıt-M» zymyran kesheniniń nysandary Reseı Federatsııasy jalǵa alǵan quramnan shyǵarylyp, Qazaqstan tarabyna qaıtaryldy. Sol kezden beri keshenniń maqsaty boıynsha jumysqa jaramdy kúıde ári qoldanýǵa ázir bolýy úshin ony «Ǵarysh ınfraqurylymyn paıdalanýdy saqtaýdy jáne keńeıtýdi qamtamasyz etý» 010 bıýdjettik baǵdarlamasy boıynsha qarjylandyrý júrgizilip keledi.
- Bıyl «Zenıt-M» ǴZK jerústi ǵarysh ınfraqurylymy nysandaryn kútip ustaý jáne paıdalaný jónindegi memlekettik tapsyrmany oryndaý úshin 937,6 mln teńge bólindi. 155 ınjenerdi jaldaý úshin 590 mln teńge mólsherinde qosymsha qarjylandyrý 2025 jylǵa arnalǵan respýblıkalyq bıýdjetti naqtylaý aıasynda pysyqtalady, - dedi Oljas Bektenov.
Aıta keteıik, Memleket basshysy Qasym-Jomart Toqaev «Baıqońyr» ǵarysh aılaǵynyń qurylǵanyna 70 jyl tolýyna oraı vıdeoúndeý joldady.
Buǵan deıin «Baıqońyr» kesheninde Týrızmdi damytý tujyrymdamasy ázirlenip jatqanyn jazǵan edik.