«Baıqońyr» kesheniniń 170 myń gektarǵa jýyq jeri jaldan shyǵarylady
QYZYLORDA. KAZINFORM — Qyzylorda oblysy Qarmaqshy aýdanynyń aýmaǵynda ornalasqan Baıqońyr qalasynda 54,3 myń adam tirkelgen. Onyń 71%-y Qazaqstan Respýblıkasynyń, 26%-y — Reseı Federatsııasynyń azamattary.
Juldyzdy shahardaǵy 12 mekteptiń 5-i, sondaı-aq myńnan astam bala tárbıelenip jatqan 5 balabaqsha qazaqstandyq bilim berý standartyna negizdelgen. Reseı Federatsııasynyń mektepterinde 2,5 myńǵa jýyq, otandyq mektepterde 5 myńǵa jýyq oqýshy bilim alyp júr. El bıýdjeti esebinen bólingen qomaqty qarajat baspana máselesine qozǵaý saldy. Sonyń arqasynda talaı jyl jaldamaly páterde júrip sharshaǵan otandastarymyzdyń óz úıine qoly jetti.
— Qalada 351 kóppáterli turǵyn úı bar. Baspana máselesin sheshý úshin Qyzylorda oblysynyń ákimdigi 2019 jyly «Nurly jer» baǵdarlamasy aıasynda 50 páterli 5 turǵyn úıdiń qurylysyn aıaqtady. Jańa shaǵyn aýdan quryldy. Bıyl qańtar aıynda onda taǵy 50 páterden turatyn 5 úıdiń qurylysy aıaqtalyp, páter ıelerine kiltter tabystaldy, — dedi oblys ákiminiń orynbasary, Qazaqstan Respýblıkasy Prezıdentiniń «Baıqońyr» keshenindegi arnaýly ókili Qaırat Nurtaı.
2019 jylǵy 3 sáýirde Máskeý qalasynda qol qoıylǵan «Baıqońyr» keshenin gazben jabdyqtaý týraly kelisimge sáıkes qalanyń turǵyn úı qory tolyq gazdandyryldy. Qala irgesindegi Tóretam jáne Aqaı eldi mekenderine de kógildir otyn jetti. Endigi jerde jergilikti jylý elektr ortalyǵy mazýttyń ornyna tabıǵı gaz tutynbaq. Bul baǵyttaǵy jumysty kelesi jyly aıaqtaý josparlanǵan.
— Qyzylorda oblysynyń ákimdigi «Baıqońyr qalasyn sýmen jabdyqtaý jáne sý burý júıelerin qaıta jańartý» jobasyn iske asyryp jatyr. Joba aıasynda uzyndyǵy 94,6 shaqyrym sý qubyry jáne 84,6 shaqyrym káriz jelileri aýysady. Qalanyń sporttyq ınfraqurylymynyń júktelýine baılanysty sport nysandaryn ulǵaıtý qajettiligi týyndap otyr. Ótken jyly dene shynyqtyrý-saýyqtyrý keshenin salý, onyń bazasynda qazaqstandyq balalar men jasóspirimder sport mektebin ashý týraly sheshim qabyldandy, — dedi Qaırat Nurtaı.
Eki eldiń «Baıqońyr» kesheni jónindegi úkimetaralyq komıssııasynyń ýaǵdalastyǵy nátıjesinde «Báıterek» ǵaryshtyq zymyran keshenin qurý jobasy iske asyrýdyń belsendi kezeńine ótti.
— Búginde jerústi tehnologııalyq jabdyqtaryn jasaýǵa jáne jańǵyrtýǵa kiristik. Jobany iske asyrý úshin «Baıqońyr» kesheniniń 170 myń gektarǵa jýyq jerin jaldan shyǵarý aıaqtalyp qaldy. Memleket basshysynyń jaıylymdyq jer aýmaǵyn ulǵaıtý jónindegi tapsyrmasy boıynsha irgeles eldi mekenderdiń aýyl sharýashylyǵy qajettiligi úshin paıdalanylmaıtyn jer ýchaskeleri jaldan alynady. Bul — shamamen 28 myń gektar jer, — dedi ol.
Buǵan deıin Qazaqstan Respýblıkasy Jasandy ıntellekt jáne tsıfrlyq damý mınıstrliginiń Aeroǵarysh komıteti Baıqońyrdyń týrıstik baǵdarlamasyn usynǵan bolatyn.