Baıqońyr qalasyndaǵy birqatar kóshege qazaqsha ataý berildi

Baıqońyr qalasyndaǵy birqatar kóshege qazaqsha ataý berildi, dep habarlaıdy Kazınform.

Bul sheshimge Baıqońyr qalalyq ákimshiliginiń basshysy Konstantın Býsygın qol qoıǵan.

Endigi kezekte qaladaǵy Avıatsıonnyı kóshesi dańqty áskerı qolbasshy, jazýshy Baýyrjan Momyshuly, Gostınıchnyı proezd kóshesi Keńes Odaǵynyń batyry Álııa Moldaǵulova, Vnýtrıkvartalnyı proezd kóshesi Keńes Odaǵynyń batyry Mánshúk Mámetovanyń atymen atalady. Sondaı-aq, atalǵan shahardaǵy uzyn Naberejnaıa kóshesi Qorqyt ata atyndaǵy jaǵalaý bolyp ózgerdi.

«Mundaı ıgilikti shara budan buryn da júzege asqan edi. Atap aıtqanda, qazirge deıin qala turǵyndary Abaı dańǵyly, Janqoja batyr kóshesimen qaýyshty. Oǵan qosa taǵy bir kóshege Uly Otan soǵysynyń ardageri Qalmyrza Jarmanovtyń qurmetine qoıylǵan bolatyn», - dep málim etti Qazaqstan Respýblıkasy Prezıdentiniń «Baıqońyr» keshenindegi arnaýly ókildiginen.