Baıqońyr qalasynda quny 161 mln teńgeni quraıtyn múlik memleketke qaıtaryldy
QYZYLORDA. KAZINFORM - Baıqońyr qalasynyń prokýratýrasymen memlekettik múlikti basqarý salasyndaǵy zańdylyqtyń saqtalýyna taldaý júrgizildi, dep habarlaıdy Qyzylorda oblysynyń prokýratýrasy.
Taldaý barysynda 2024-2025 jyldary memlekettik menshiktegi 9 nysan birqatar mindetti talaptardy oryndaý shartymen senimgerlik basqarýǵa berilgeni anyqtaldy.
Atap aıtqanda, senimgerlik basqarýshylar nysandarda bir jyl ishinde jóndeý jumystaryn júrgizýge, azamattardy jumyspen qamtýdy qamtamasyz etýge, belgilengen merzimderde esepter usynýǵa, sondaı-aq múlikti nysanaly maqsatyna sáıkes paıdalanýǵa mindettengen.
Alaıda balans ustaýshy («Ǵarysh-Infraqurylym» KMM) tarapynan buzýshylyqtardy joıý týraly birneshe márte talaptar men eskertýler berilgenine qaramastan, senimgerlik basqarýshylar ózderine alǵan mindettemelerdi oryndamaǵan jáne shart talaptarynyń saqtalýyn qamtamasyz etpegen. Atalǵan mán-jaılar múlikti memleketke qaıtarýǵa negiz bolady.
Baıqońyr qalasy prokýratýrasynyń usynýymen jalpy quny 161 mln teńgeni quraıtyn 5 nysan boıynsha múlikti keıinnen satyp alý quqyǵymen jasalǵan senimgerlik basqarý sharttary birjaqty tártippen buzylyp, múlik memleket menshigine qaıtaryldy.
-Memleket múddesin qorǵaý baǵytyndaǵy jumystar jalǵasyn taýyp,Baıqońyr qalasynyń prokýratýrasynyń turaqty baqylaýynda bolady,-delingen Qyzylorda oblysy prokýratýrasynyń baspasóz qyzmeti taratqan habarlamada.
Osyǵan deıin Reseıdiń jaldaýynan shyǵarylǵan nysandar Baıqońyrdyń týrıstik baǵyttaryna qosylǵany týraly jazdyq.
