Baıqońyr qalasy turǵyndarynyń úıinen 180-ge jýyq dinı ádebıet tabyldy
QYZYLORDA. KAZINFORM — Qyzylorda oblysynda jyl basynan beri din salasynda 14 ákimshilik quqyqbuzýshylyq tirkeldi.
Oblystyq polıtsııa departamentiniń baspasóz qyzmeti habarlaǵandaı, quqyqbuzýshylyqtardyń basym bóligi departamenttiń ekstremızmge qarsy is-qımyl basqarmasy júrgizgen reıdtik is-sharalar, sondaı-aq áleýmettik jeliler men ınternet-resýrstardaǵy monıtorıng nátıjesinde anyqtalǵan.
— Dinı ádebıetter men dinı mazmundaǵy basylymdardy tek arnaıy ruqsaty bar, zańdy túrde tirkelgen saýda oryndary ǵana sata alady. Soǵan qaramastan mundaı ónimderdi ınternet arqyly zańsyz satý faktileri kezdesip otyr. Osyǵan baılanysty Ákimshilik quqyqbuzýshylyq kodeksiniń 453, 490-baptaryna sáıkes dinı ádebıetterdi jáne dinı maqsattaǵy ózge de materıaldardy zańsyz ákelgeni nemese taratqany úshin jeke tulǵalarǵa 50, zańdy tulǵalarǵa 200 aılyq eseptik kórsetkish mólsherinde aıyppul qarastyrylǵan. Baıqońyr qalasynyń 34 jáne 38 jastaǵy turǵyndarynyń úılerin tintý barysynda 180-ge jýyq dinı ádebıet anyqtalyp, kodekstiń 490-baby boıynsha ákimshilik hattamalar toltyryldy. 32 jáne 36 jastaǵy oblys turǵyndary «VKontakte» áleýmettik jelisi arqyly dinı mazmundaǵy aýdıo jáne beınematerıaldardy taratqan. Bul derekter áleýmettik jelilerge júrgizilgen monıtorıng barysynda belgili bolǵan. Olar ákimshilik jaýapkershilikke tartylyp, 120 myń teńgeden astam aıyppul salyndy, — delingen habarlamada.
Jýyrda Májilis depýtaty Ermurat Bapı teris dinı aǵymdarǵa tosqaýyl qoıý máselesin kóterip, QR Bas prokýrory Berik Asylovtyń atyna saýal joldady.
