«Baıqońyr» ǵarysh aılaǵy álemdik týrıstik ortalyqqa aınalady
ASTANA. KAZINFORM – Premer-Mınıstrdiń tapsyrmasymen Baıqońyr kesheninde týrızmdi damytýdyń 2030 jylǵa deıingi tujyrymdamasy bekitildi. Qujat halyqaralyq deńgeıde básekege qabiletti týrıstik ónim qalyptastyrýǵa jáne salanyń turaqty damýyna qajetti jaǵdaı jasaýǵa baǵyttalǵan.
Tujyrymdamany iske asyrý aıasynda sheteldik týrıster úshin ruqsat berý rásimderi jeńildetildi. Qazirgi tańda qajetti qujattardy rásimdeý merzimi 10 kúnge deıin qysqartyldy. Bul keshenniń sheteldik qonaqtar úshin qoljetimdiligin arttyryp, ǵarysh apparattarynyń ushyrylymdaryn tamashalaýǵa arnalǵan týrıstik baǵdarlamalardyń damýyna serpin beredi.
Týrızmdi damytýǵa Qazaqstannyń qaramaǵyna birqatar nysannyń berilýi de jańa múmkindikter ashyp otyr. Olardyń qatarynda Gagarın ushý alańy, montajdaý-janarmaı quıý kesheni jáne dınamıkalyq synaqtar stendi bar.
Atalǵan nysandardyń týrıstik áleýeti joǵary. Olar ǵylymǵa, tehnologııaǵa jáne ǵarysh tarıhyna qyzyǵatyn álemniń túkpir-túkpirinen keletin saıahatshylar úshin mańyzdy tartymdylyq ortalyǵyna aınala alady.
Qazirgi ýaqytta nysandardy jańǵyrtýǵa jáne zamanaýı týrıstik ınfraqurylym qalyptastyrýǵa múddeli ınvestorlarǵa arnalǵan ınvestıtsııalyq usynystar ázirlengen.
Sondaı-aq ushyrylymdar arasyndaǵy kezeńde oqıǵaly týrızmdi damytýǵa erekshe nazar aýdarylyp otyr. Bul bastama jyl boıy turaqty týrıstik aǵyn qalyptastyrýǵa jáne keshenniń qoldanystaǵy ınfraqurylymyn tıimdi paıdalanýǵa múmkindik beredi.
Baıqońyrdy álemdik deńgeıdegi týrıstik ortalyq retinde damytý – týrızm salasyn ártaraptandyrýdyń mańyzdy baǵyttarynyń biri. Bul Qazaqstannyń halyqaralyq týrıstik naryqtaǵy ustanymyn nyǵaıtyp, eldiń týrıstik tartymdylyǵyn arttyrýǵa yqpal etedi.
Eske sala keteıik, buǵan deıin Baıqońyr aýmaǵynda 1,9 mln tonna qaldyq anyqtalǵanyn jazǵanbyz.
