Baıqońyr aýrýhanasynda bala kóz jumdy: basqarma sebebin túsindirdi
QYZYLORDA. KAZINFORM — Baıqońyr qalasynda terezeden qulap ketken bala aýrýhanada kóz jumdy.
Kazinform tilshisiniń saýalyna oraı Qyzylorda oblystyq densaýlyq saqtaý basqarmasy túsinik berdi.
— 2023 jyly týǵan bala 5-qabattan qulaǵannan keıin Reseıdiń № 1 federaldy medıtsınalyq-bıologııalyq agenttiginiń Baıqońyr qalalyq № 1 ortalyq medıtsınalyq-sanıtarlyq bólimine aýyr jaǵdaıda túsken. Qyzylorda qalasynyń sanıtarlyq avıatsııa jelisi arqyly reanımatolog dáriger keńes bergen. Ómirine qaýip tóndiretin jaraqaty bolýyna baılanysty patsıent avıatsııamen tasymaldaıtyn jaǵdaıda emes edi. Dárigerlerdiń birlese kúsh salǵanyna qaramastan balany qutqaryp qalý múmkin bolǵan joq. Qaıǵyly jaǵdaıǵa baılanysty kóz jumǵan balanyń otbasyna qaıǵyryp kóńil aıtamyz, — dedi basqarmanyń ana men bala densaýlyǵyn qorǵaý bóliminiń basshysy Aıgúl Asylbekqyzy.
Buǵan deıin Pavlodar oblysynyń Aqsý qalasynda 2023 jyly týǵan bala úshinshi qabattan qulap ketip kóz jumǵan edi.
