Baıqońyr aýmaǵynda 1,9 mln tonna qaldyq anyqtalǵan
ASTANA. KAZINFORM – Qazaqstanda zańsyz qoqys polıgondaryn joıý jáne Baıqońyr kesheninde jyldar boıy jınalǵan qaldyqtardy retke keltirý baǵytynda birqatar jumys júrgizilip jatyr. Bul týraly Ekologııa jáne tabıǵı resýrstar mınıstrliginiń ókilderi málim etti.
Ekologııalyq retteý jáne baqylaý komıtetiniń tóraǵasy Erbolat Qojyqovtyń aıtýynsha, Baıqońyr keshenindegi negizgi ekologııalyq máselelerdiń biri Reseı jalǵa alǵan aýmaqta jyldar boıy jınalǵan qaldyqtarǵa qatysty.
Onyń sózinshe, 2018 jyly Baıqońyrǵa qarasty Tóretam jáne Aqaı eldi mekenderi aýmaǵynda túgendeý jumystary júrgizilip, nátıjesinde shamamen 1,9 mln tonna qaldyq anyqtalǵan. Onyń basym bóligi qurylys qaldyqtary bolǵan.
– Bul máseleni sheshý úshin Baıqońyr ákimshiligimen birlesip 2025-2030 jyldarǵa arnalǵan jol kartasy bekitildi. Qazirgi ýaqytta jospar aıasyndaǵy jumystar jalǵasyp jatyr. 2025 jyldan beri 17 myń tonna qaldyq jınaldy, – dedi komıtet tóraǵasy Ortalyq kommýnıkatsııalar qyzmeti alańynda.
Baıqońyrdaǵy qaldyq máselesi Qazaqstan men Reseı arasyndaǵy úkimetaralyq komıssııa deńgeıinde de qaralǵan. Nátıjesinde reseılik tarap bul máseleni sheshýge qatysty tıisti sheshimder qabyldaǵan.
Al Qaldyqtardy basqarý departamentiniń dırektory Rýslan Túkenov respýblıka boıynsha qaldyqtardy basqarý ınfraqurylymyn damytý jumystary júrip jatqanyn aıtty.
Onyń málimetinshe, mınıstrlik búginge deıin qoqys tasymaldaıtyn arnaıy tehnıka, suryptaý jelileri men qaıta óńdeý kásiporyndaryn qamtıtyn 61 jobany maquldaǵan.
Aıta keteıik, «Baıqońyr» ǵarysh aılaǵyn jalǵa berý qunyn kóterý múmkindigine qatysty jazǵan edik.
