«Baıqaýlar shyn júıriktiń baǵasyn ósire me, túsire me?» - respýblıkalyq basylymdarǵa sholý
***
«Alyp elmen jarastyqtyń ónegeli qyry». Osyndaı taqyryppen «Egemen Qazaqstan» gazetinde jaryq kórgen maqala Memleket basshysy N.Nazarbaevtyń Qytaı Halyq Respýblıkasyna jasap otyrǵan memlekettik saparyna arnalǵan. Basylymnyń atap ótýinshe, «Dıaoıýıtaı» memlekettik rezıdentsııasynda Qazaqstan Prezıdentine «Jyldamdyǵy joǵary Astana-Almaty temir jol magıstrali qurylysynyń» jobasy tanystyryldy. Bul joldyń qurylysy barysynda Astanada jańa temir jol vokzalyn salý, Almatydaǵy temir jol vokzalyn qaıta jańǵyrtý, Qaraǵandy men Balqash qalalarynda jańa termınaldar salý, jol boıynda 54 óndiristik nysan turǵyzý jumystary júzege asady. Qytaılyq mamandardyń esepteýleri boıynsha, ınnovatsııalar men jańa tehnologııalardy paıdalana otyryp, joldy tórt jyldyń ishinde salyp, tolyq iske qosýǵa bolady. Elbasy sapary jaıynda tolyq bilgińiz kelse, «Egemen Qazaqstan», «Kazahstanskaıa pravda», «Aıqyn», «Alash aınasy» gazetteriniń sársenbilik nómirine nazar salyńyz.
Kárim Másimovtiń tóraǵalyǵymen ótken keshegi Úkimet otyrysynda elimizdiń 2010 jylǵy ekonomıkalyq-áleýmettik damý qorytyndysy jáne 2010 jylǵy memlekettik bıýdjettiń atqarylý máseleleri talqylandy. Osyǵan oraı «Egemen Qazaqstan» gazetiniń búgingi sanynda «Daǵdarystan keıingi damýdyń tuǵyryna aınalǵan jyl» degen taqyryppen kólemdi maqala jarııalandy. «Jalpy aıtqanda, 2010 jyly elimizdiń ekonomıkasynyń barlyq salasynda ósý deńgeıi turaqty túrde saqtalǵan. El ekonomıkasy ótken jyly daǵdarysqa deıingi damý deńgeıin qalpyna keltirip qana qoımaı, aldaǵy ýaqytta odan ári turaqty damý tuǵyryn qamtamasyz etti. Búgingi kúnge deıingi derekter boıynsha 2010 jylǵy memleketimizdiń ishki jalpy óniminiń ósimi 2009 jylmen salystyrǵanda 7 paıyzǵa artty», - dep jazady basylym.
***
Qazaqstan turǵyndarynyń basym bóligin, ıaǵnı 53,8 paıyzyn azyq-túlik baǵasynyń qymbattaýy alańdatady. Degenmen eldiń turmys jaǵdaıy kúrt nasharlaǵan jaǵdaıda kópshilik, atap aıtqanda 69,4 paıyz el azamaty qosymsha kúnkóris kózderin izdep, jaǵdaıǵa beıimdelýge daıar eken. «Aıqyn» gazetiniń jazýynsha, bul týraly keshe Qazaqstan Prezıdenti janyndaǵy Qazaqstan saıası zertteýler ınstıtýty uıymdastyrǵan «Eldegi áleýmettik-saıası ahýal konteksindegi Qazaqstan Respýblıkasynyń Prezıdent saılaýy» atty dóńgelek ústel barysynda aıtylǵan. Áleýmettik zertteýler nátıjelerine súıensek, eldiń kópshiligi qıyndyqqa shydap ketýge ázir bolǵanymen, 2009 jylmen salystyrǵanda qoǵamdaǵy narazy kóńil kúı deńgeıi de birshama ósken. Aıtalyq, respondentterdiń 10,6 paıyzy qandaı da bir formada narazylyq bildirýge ázir. Olardyń 2,4 paıyzy zańsyz sherýler, narazylyq aktsııalaryna qatysýdan bas tartpasa, 4,5 paıyzy tek zańsyz narazylyq jıyndaryna barýǵa qulyqty. Bul jaıynda egjeı-tegjeıli maǵlumat alǵyńyz kelse, basylymdaǵy «Saılaý kezindegi ahýal qandaı bolmaq?» degen maqalaǵa nazar salyńyz.
Osy basylymnyń dástúrli «Aq sóıle!» aıdarynda «QazMunaıGaz» UK AQ Basqarma tóraǵasy Qaıyrgeldi Qabyldınmen aradaǵy suhbat «Bizge artylyp otyrǵan úmit te, jaýapkershilik te úlken» degen taqyryppen berilgen. Basylym tilshisiniń barlyq saýaldaryna tuşymdy jaýap bergen ol: «Táýelsizdik jyldary Qazaqstannyń munaı-gaz salasy býyny bekip, el ekonomıkasynyń negizgi tiregine aınaldy. Qazaqstan munaıy degende, aldymen Atyraý men Mańǵystaý óńirlerindegi iri kenishter oıǵa oralady. Máselen, «Teńiz» kenishiniń ıgerilýi men Kaspıı qaırańyndaǵy Qashaǵan kenishiniń ashylýy elimizge sheteldik munaı kompanııalarynyń kelýine jol ashqany barshaǵa málim. Shetel kompanııalarynyń ınvestıtsııa salýǵa kelisim berýi, árıne, Elbasy N.Nazarbaevtyń eńbegi», - deıdi.
***
Sońy ýaqytta konkýrs ótkizý sánge aınaldy. Aıtýly merekelerge oraı beldi, bedeldi uıymdardyń uıymdastyratyn básekeli syndary óz aldyna, qazir ár sala, irili-usaqty ár mekeme, tipti jekelegen adamdar da ádebıet, óner, jalpy mádenıet salasyna qatysty báıge jarııalaýdy jıiletti. Atalǵan sala ókilderin sál de bolsa yntalandyrýǵa sebepker bolatyndyǵyn eskersek, bul, bir jaǵynan, óte quptarlyq ta, qýanarlyq ta jaǵdaı. Biraq jurtty dúrliktiretin sol konkýrstar, báıgeler qalaı ótkizilip júr? Bul jaıyndaǵy tolymdy aqparatqa qanyqqyńyz kelse, «Alash aınasy» gazetiniń sársenbiniń sátinde shyqqan nómirindegi «Baıqaýlar shyn júıriktiń baǵasyn ósire me, túsire me?» degen maqalaǵa kóz júgirtińiz.
Osydan on shaqty kún buryn Almatydaǵy Soldatskoe ýşeleni «Azıada shatqaly» dep atap jóninde usynys jasaǵan «Alash aınasy» basylymy atalǵan taqyrypqa qaıta qalam tartyp otyr. Basylymnyń atap ótýinshe, qazirdiń ózinde bul usynysty qoldaýshylar sany óte kóp deýge de bolady. Olardyń birazy hat arqyly pikirlerin bildirse, basym bóligi redaktsııaǵa qońyraý shalyp, osy isti aıaǵyna deıin jetkizýdi ótingen eken. Osyǵan oraı basylym Parlament depýtattarynyń, elge esimi belgili sportshylarymyzdyń pikirlerin jarııalap otyr.
***
«Kazahstanskaıa pravda» gazetiniń jazýynsha, keshe Astanada Adam quqyqtary jónindegi ýákil Asqar Shákirov syrtqy ister jónindegi komıtettiń múshesi Nıkol Kııl-Nılsenniń basshylyǵymen kelgen Eýropalyq Parlament delegatsııasymen kezdesti. Delegatsııa Qazaqstanǵa basym baǵyttarynyń biri retinde adam quqyqtary salasyndaǵy yntymaqtastyq bolyp tabylatyn Eýropalyq Odaq pen Ortalyq Azııa elderi arasyndaǵy jańa áriptestiktiń 2007-2013 jyldarǵa arnalǵan strategııasynyń iske asyrylýy barysymen tanysý úshin keldi. A.Shákirov qonaqtardy adam quqyqtaryn qamtamasyz etý salasynda, onyń ishinde zańnamalyq baza men quqyq qoldaný tájirıbesin jetildirý, úkimettik emes jáne halyqaralyq uıymdarmen ózara árekettesý, halyqqa quqyqtyq bilim berý máselelerindegi memlekettiń qyzmetimen tanystyrdy.
