Baıqaýda jeńiske jetken jýrnalısterge Qorǵanys mınıstriniń atynan dıplomdar tabys etildi

ASTANA. QazAqparat - Jýrnalıster kúni qarsańynda QR Qorǵanys mınıstri Imanǵalı Tasmaǵambetov jýrnalısterdi quttyqtady. «KADEX-2016» kórmesin buqaralyq aqparat quraldarynda taratýdyń úzdigi baıqaýynyń jeńimpazdaryna arnaıy dıplomdar tabys etildi, dep habarlady Qorǵanys mınıstrliginiń baspasóz qyzmeti.

Qorǵanys mınıstrligi «KADEX-2016» 4-shi halyqaralyq qarý-jaraq pen áskerı múlik kórmesin ótkizý aıasynda buqaralyq aqparat quraldarynda taratylǵan úzdik materıaldarǵa baıqaý jarııalaǵanm bolatyn.

Qazaqstannyń qalalyq jáne respýblıkalyq buqaralyq aqparat quraldary arasynda, sondaı-aq elektrondyq buqaralyq aqparat quraldary arasynda memlekettik jáne orys tilderinde jeke atalymdar boıynsha baıqaý ótti.

Bul baıqaýǵa «KADEX» IV halyqaralyq qarý-jaraq pen áskerı múlik kórmesi týraly materıaldaryn baspa betterinde jarııalap júrgen gazet, radıo jáne teledıdar jýrnalısteri, aqparattyq agenttikter men shtattan tys avtorlar qatysty.

Kórmeniń  oqıǵalaryn taratý, kórmeni ótkizý kezeńi, sondaı-aq ony ótkizý qorytyndysy boıynsha materıaldar baıqaý jumystaryna arqaý boldy.

Baıqaýdyń qorytyndysy boıynsha jeńimpazdar: «Baspa basylymdaryndaǵy úzdik jarııalanym» atalymy boıynsha - «Vremıa» gazetiniń tilshisi Leıla Tastanova, «Úzdik telesıýjet/telebaǵdarlama» - «Habar» agenttiginiń tilshisi Maqpal Madııarova, «Evrazııa birinshi arnasynyń» tilshisi Oljas Núrekenov, «Úzdik radıo sıýjet/radıo baǵdarlama» atalymynda jýrnalıst Mádına Ishanova jáne «Astana radıosynyń» jýrnalısti Olga Ashojına, «Internettegi úzdik jarııalanym» atalymy boıynsha «Bnews» tilshisi Dáýren Erbolatov marapattaldy.  Áskerı taqyrypty taratýda qosqan úlesi, belsendi ustanymy men obektıvtiligi jáne joǵary kásipqoılyǵy úshin «Egemen Qazaqstan» gazetiniń bas redaktory Janbolat Aýypbaev, «Kazahstanskaıa pravda» gazetiniń  bas redaktory Tatıana Kostına, «Kazahstanskaıa pravda» gazetiniń tilshisi Dýlat Moldabaev, «Qazınform» halyqaralyq aqparattyq agenttigi bas dırektordyń orynbasary Qalamqas Ábýova, blogerler Qanat Áýesbaı, Evgenıı Pereverzev nagradtaldy.

 «Men «Qazaqstan Paramaýnt Injınırıng» zaýyty jóninde jazdym. Barlyǵyn óz kózimmen kórdim. Meni tańǵaldyrǵan zaýyttyń qýaty, ıaǵnı bir aınalymnyń aıaqtalýy boldy: ónimniń kishkentaı bólshegin qurastyrǵan sátinen bastap polıgonǵa jiberilgenge deıingi kezeńdi kórdim. Sol áserden osy materıal jazyldy. Búgingi alǵan dıplom sol eńbegimniń jemisi», - dedi semınarǵa qatysýshy Leıla Tastanova.

Materıaldardyń sapasy túrli shart boıynsha, atap aıtqanda - taqyryptyń ózektiligi men mańyzdylyǵy, taqyryptyń dál mazmundalýy men ony tereń ashylýy, salystyrmaly aqparattyq, statıstıkalyq jáne naqty taldaý derekterin  paıdalanýy eskerilgenin aıta ketken jón.