Baykar ushqyshsyz ushý apparattary eksportyndaǵy álemdik kóshbasshylyǵyn saqtap qaldy

ASTANA. KAZINFORM — Baykar kompanııasy ótken jyly 2,2 mıllıard dollar kólemindegi eksport kórsetkishimen qarýlanǵan ushqyshsyz ushý apparattaryn (UUA) álemdik naryqta eksporttaý boıynsha kóshbasshylyǵyn saqtap qaldy. Bul týraly Anadolý jazdy.

Baykar málimdemesine sáıkes, Túrkııanyń ulttyq jáne biregeı UUA-laryn ázirleıtin kompanııa byltyr da óz segmentindegi eń iri eksporttaýshy bolyp qala berdi.

Sońǵy úsh jyl boıy álemdik naryqtyń kóshbasshysy atanyp kele jatqan Baykar 2025 jyly eksport kólemin 2,2 mıllıard dollarǵa jetkizip, óz rekordyn jańartty. Álemdik deńgeıde tabysty avıatsııalyq platformalardy ázirleıtin kompanııa Túrkııanyń joǵary tehnologııaly eksportyndaǵy negizgi qozǵaýshy kúshterdiń birine aınaldy.

Ótken jyly Baykar-dyń jalpy tabysy 2,5 mıllıard dollardy qurady, onyń 88 paıyzy eksporttan túsken.

Túrkııa Prezıdenti Ákimshiliginiń Qorǵanys ónerkásibi basqarmasy uıymdastyrǵan Qorǵanys jáne avıatsııa ónerkásibindegi jahandyq strategııalar jónindegi 5-konferentsııada jarııalanǵan derekterge sáıkes, Túrkııanyń qorǵanys ónerkásibindegi jetekshi eksporttaýshylar arasynda ekinshi oryn alatyn Baykar ushqyshsyz ushý apparattaryn eksporttaý salasyndaǵy kóshbasshylyǵyn aıqyn basymdyqpen saqtap qaldy.

Álemdegi eń iri ushqyshsyz ushý apparattaryn óndirýshi kompanııa sanalatyn Baykar 37 elmen eksporttyq kelisimsharttarǵa qol qoıǵan. Onyń ishinde 36 el Bayraktar TB2 apparatyna, al 16 el Bayraktar AKINCI dronyna kelisim jasaǵan.

Eske sala ketsek, byltyr qazaqstandyq ınjener AQSh-taǵy eń úzdik 10 dron ázirleýshiniń qataryna endi.