Baıkaldaǵy marafon kezinde máskeýlik shańǵyshy ajal qushty
ASTANA. QazAqparat -Máskeýlik shańǵyshy Baıkal muz marafony kezinde kenetten júregi toqtap, kóz jumdy. Bul týraly TASS shara uıymdastyrýshylaryna silteme jasap habarlady.
Óz esimin ataýdy jón kórmegen aqparat kózi 35 jastaǵy sportshynyń neden ólgenin anyqtaý maqsatynda máıitti soıyp jatqanyn habarlady. «Aldyn ala boljam boıynsha, sportshynyń júregi kenetten toqtap qalǵan. Dáriger onyń ómirin saqtap qalýǵa qansha tyrysqanymen, er adamdy ajaldan arashalap qala almady», - dedi aqparat kózi.
Baıkal muz marafony 7 naýryz kúni «Zımnıada - 2017» halyqaralyq festıvali aıasynda ótken. Bul marafon álem boıynsha eń kúrdeli jarystardyń biri bolyp sanalady. Básekege álemniń 32 elinen 200 sportshy qatysty.
