Baıkalda muz astyna ketken kólikten jeti adamnyń máıiti tabyldy
ASTANA. KAZINFORM — Reseıde Baıkal kólinde qytaılyq týrıster mingen «ÝAZ» avtokóligi muz astyna túsip ketti, dep habarlaıdy Kazinform agenttiginiń Máskeýdegi menshikti tilshisi.
Irkýtsk oblysynyń prokýratýrasy málimetinshe, Irkýtsk oblysy aýmaǵyndaǵy Baıkal kólinde, Olhon aralynyń Hoboı múıisi mańynda muz astyna ketken «ÝAZ» kóliginde segiz týrıst bolǵan.
Olardyń bireýi aman qalǵan, qalǵan jolaýshylar men júrgizýshini izdeý jumystary júrgizildi.
Óńirlik Reseı TJM qutqarýshylary kólik batqan jerdi tekserý barysynda jeti adamnyń máıitin tapqanyn habarlady. Іzdeý jumystary sýasty kamerasynyń kómegimen júrgizilgen. Aldaǵy ýaqytta súńgýirlerdiń qatysýymen qosymsha jumystar josparlanǵan.
Aldyn ala málimet boıynsha, kólik júrip bara jatyp eni shamamen 3 metr bolatyn muz astyna túsip ketken. Oqıǵa ornyndaǵy tereńdik 18 metr bolǵan.
Atalǵan derek boıynsha prokýrorlyq tekseris bastalyp, qaýipsizdik talaptaryna saı kelmeıtin qyzmet kórsetý (QR QK-niń 238-babynyń uqsas normasy) jáne salǵyrttyq (293-baptyń 3-bóligi) boıynsha qylmystyq is qozǵaldy. Oqıǵanyń barlyq mán-jaıy, sebepteri men jaǵdaılary anyqtalyp jatyr.
Prokýratýra deregine sáıkes, aman qalǵan týrıst qutqarylǵan.
Oqıǵa týraly QHR Bas konsýldyǵy Irkýtskide habardar etilgen.
