Baıqal kóliniń saıazdanýy jalǵasýda - ǵalymdar
ASTANA. QazAqparat - Baıqaldaǵy sý deńgeıi 19 aqpanda 456 metr bolyp, eń tómengi mejege jetti. Kóktemgi sý tasqyny bastalǵanǵa deıin onyń deńgeıi taǵy da 13-15 santımetrge deıin tómendeýi múmkin, dep habarlady National Geographic Russia.
Baıqaldyń shekti deńgeıi RF Úkimetiniń 2001 jylǵy 26 naýryzdaǵy qaýlysy talaptarymen shektelgen. Sý deńgeıiniń eń tómengi mejesi 456,0 metr, joǵarǵy deńgeıi 457,0 metr bolyp belgilengen.
Úkimet pen ekologtar kóldiń saıazdaný úrdisi ótken jyly bastalǵanyn atap ótýde: Býrıatııa men Irkýtsk oblysynda kúzde eleýli jaýyn-shashyn bolmady, sonyń saldarynan Baıqalǵa quıatyn ózenderdiń aǵysy tómendedi. 2015 jyldyń basynda óńirde ylǵaldyń azaıýynan joǵary daıarlyq rejımi engizildi.
Býrıat óńiri órt qaýpi joǵary aımaqqa jatady, al kólderdiń deńgeıi tómendeýinen onyń qaýpi arta túsýde, óıtkeni jaǵalaýdaǵy ormandar qurǵap qalady. Sonymen birge shymtezek qurǵap, órtene bastaıdy.
RF Úkimetiniń tóraǵasy Dmıtrıı Medvedev budan buryn «2014-2015 jyldardaǵy kúzgi-qysqy kezeńdegi Baıqal kólindegi sý deńgeıiniń shekti mólsheri týraly» qaýlyǵa qol qoıǵa bolatyn. Bul qujatqa sáıkes Baıqal alabynyń sý resýrstaryn uqypty paıdalaný talaptary belgilendi. Bul shara tótenshe jaǵdaı qaýpiniń aldyn alýdy, halyqty sýmen, jylýmen jáne elektrmen jabdyqtaýdy qamtamasyz etýdi kózdeıdi.
