Báıge atyn soıyp, satyp jibergen aqtóbelik bas bostandyǵynan aıyryldy

AQTÓBE. KAZINFORM – Aqtóbelik óziniń tanystarymen birge bótenniń báıge atyp soıyp, etin bazarǵa ótkizip jibergen. Sottalýshynyń kinási tolyq dáleldenip, ol 5 jylǵa bas bostandyǵynan aıyryldy.

Qylmystyq is №2 Aqtóbe qalalyq sotynda qaraldy. Prokýror Aıdar Álimjanovtyń sózinshe, 35 jastaǵy K.Aıbek buǵan deıin Qylmystyq kodekstiń «Tonaý» baby boıynsha sottalyp, jazasyn bostandyqta ótep júrgen. Soǵan qaramastan ol byltyr jeltoqsan aıynda óz tanystarymen birge aldyn ala aqyldasyp, Aqtóbe qalasy Qýraıly aýylyna barady. Kólikti odan buryn kózdegen úıdiń mańyna toqtatyp, qoradaǵy báıge atyn jetektep shyǵady. Ekeýi bóten bireý kórip qalmaýyn qadaǵalasa, taǵy ekeýi jylqyny sol jerde soıyp alady. Keıin etin kólikke tıep, bazarǵa ótkizedi. Sottalýshy K.Aıbek kinásin tolyq moıyndady. Sol kúni túste mal izdep baryp, qoradaǵy jylqyny kóredi. Keıin tanysyna soǵym alyp keletinin aıtyp, qolǵabys etýin ótinedi. Sóıtip tórteýi soıyp, etti ótkizip, árkim qyzmeti úshin aqy alady. Sot otyrysy kezinde jábirlenýshi N.Kákimov báıge atyn 2 mln teńgege satyp alǵanyn, aǵasynyń qorasynda baqqanyn jetkizdi. Sonymen birge keshirim de berdi.

Sot úkimimen buryn sottalǵan K.Aıbek Qylmystyq kodeksiniń 188-1-baby 3-bóliginiń 2-tarmaǵymen kózdelgen qylmysty jasaǵany úshin kináli dep tanylyp, túpkilikti 6 jyl merzimge bas bostandyǵynan aıyrý túrinde jaza taǵaıyndaldy. Jazasyn qylmystyq-atqarý júıesiniń qaýipsizdigi barynsha joǵary mekemesinde óteıdi. Onyń janynda bolǵan J.Qanaǵat, T.Manarbek, Á.Darhan 5 jyl merzimge bas bostandyǵynan aıyryldy. Sot Qylmystyq kodekstiń 63-babyna saı taǵaıyndalǵan jazany shartty dep sanap, probatsııalyq baqylaý bekitti.

Eske salsaq, buǵan deıin Aqtóbede búıregin 15 mln teńgege satpaq bolǵan qaraǵandylyq raqymshylyqqa ilikti.