Baıdildın: Keıki batyr jaıly týyndydaǵy derekter - elý jyldyń eńbegi
Arqalyq qalasynyń qurmetti azamaty, ólketanýshy Shóptibaı Baıdildınniń bul eńbeginde buryn baspasóz betinde jarııalanbaǵan dańqty qolbasshy Keıki Kókembaıulynyń san qıly taǵdyry sóz bolady. Kitapqa batyrdyń tustastary men kózin kórgen qarttardan estigen áńgimeler, sol kezeńdegi Torǵaı ólkesiniń tynys-tirshiligi, Ulytaý men Uly Jylanshyq aımaǵynan jınalǵan materıaldar men fotosýretter engen.
«Keıki batyr jaıly kitap jazýdy sonaý 1963 jyldan beri armandaǵan edim. Óıtkeni, eń birinshiden men sol Keıki batyr týǵan óńirde óstim, sol eldiń azamatymyn. Ekinshiden, Keıkiniń kózin kórgen, batyrmen dámdes bolǵan qarııalarmen jıyrma jyldan astam aralas-quralas boldym, san ret áńgime-dúken qurǵanmyn. Keıki jaıly el aýzynan jınastyrǵan maǵlumattar elý jyldyń eńbegi. Sondyqtan da Keıki jaıly óz qal-qadirimshe oı tolǵaımyn. Oqyrman keregin alar, artyq-kemin ólsher», - deıdi avtor.
Aıta keteıik, Keıki batyrdy 1923 jyly qyzyl ásker jaýyngerleri óltirgen. Sodan keıin bas súıegi kýnstkameraǵa jóneltilgen. Sankt-Peterbýrg qalasyndaǵy kýnstkamerada 93 jyl boıy saqtalyp kelgen Keıki batyrdyń bas súıegi elimizge ótken jyly qaıtarylǵan bolatyn. Osydan keıin arnaıy qurylǵan memlekettik komıssııa Keıki batyrdyń súıegin onyń týǵan jeri - Qostanaı oblysy Amangeldi aýdanynyń Tasty aýylynda jerleý týraly sheshim qabyldady.
