Báıdibektik sharýalar elektrondy karta arqyly jeńildikterge ıe bolýda

TÚRKІSTAN. QazAqparat - Báıdibek aýdanynda eginshilikpen aınalysatyn kooperatıvterdiń 90 paıyzy elektrondy kartaǵa engizilip, memlekettik jeńildikterdi alyp jatyr.Bul týraly QazAqparat ákimniń baspasóz qyzmetine silteme jasap habarlaıdy.

Aýdandyq aýyl sharýashylyǵy bóliminiń basshysy Kúmisbek Ahmetovtyń aıtýynsha, bul bastama «Tsıfrly Qazaqstan» baǵdarlamasy sheńberinde júzege asyrylǵan.

«Sharýalar egistik alqaptaryn elektrondy kartaǵa engizip, bir tereze qaǵıdasy arqyly qujattaryn rettegen. Olarǵa mamandarymyz kómektesedi. Elektrondy karta júıesiniń artyqshylyǵy -sharýalar úılerinde otyryp-aq ǵalamtor arqyly tyńaıtqysh pen ózge de qajetti jeńildikterge tapsyrys bere alady. Qazir aýdanda jerdi ıgerýge nıetti turǵyndar sany artyp keledi. Bıyl 94,6 myń gektar jer ıgerildi. Byltyrǵa qaraǵanda 3 myń gektarǵa artyq» - deıdi K.Ahmetov.

Bıyl Báıdibek aýdanynda qoı sany 600 myńǵa jetip, ótken jylmen salystyrǵanda 7 paıyzǵa ulǵaıǵan. Іri qara sany 60 myńǵa, jylqy 200 myńǵa jetti. Túıe basy da kóbeıgen.
Búginde aýdanda aýyl sharýashylyǵyna mán berilip, kooperatıvterdiń jumysy jandanýda. Solardyń qataryndaǵy «Alǵabas-Aǵybet» óndiristik kooperatıvi men «Ersultan-agro» JShS-gi egin sharýashylyǵymen birlesip aınalysýda. Birlesken sharýashylyq Alǵabas, Aǵybet aýyldyq okrýgi aýmaǵynan 2000 gektar jerge bıdaı, 1500 gektar jerge maqsary, 500 gektar jerge arpa, 400 gektar jerge jońyshqa ekken.

Atalǵan sharýashylyqta Alǵabas, Aǵybet aýyldyq okrýginiń 20-ǵa jýyq turǵyny turaqty jumyspen qamtylǵan. Al, maýsymdyq jumystar qyzǵan kezde 45-50 adamdy jumysqa tartylyp, olarǵa 80 myń teńge kóleminde eńbekaqy tólenedi. Sharýashylyqta 35 tehnıka bar. Munda sharýalar «Steklovıdnyı 24, «Krasnyı vodopad», «Pamıat 47» bıdaı suryptaryn ekken.

Sonymen qatar arpamen sulyny býdandastyryp ónim alýda. 6 tamyzda 500 gektar maqsary ónimin orý jumystary bastaldy.