Báıdibekte polıtseıler borandy kúni qar qursaýynda qalǵan jolaýshylarǵa kómektesti
TÚRKІSTAN. QazAqparat- Túrkistan oblysynda polıtseıler borandy kúni qar qursaýynda qalǵan jolaýshylarǵa kómektesti. Asýda qarǵa batyp, keptelis týdyrǵan kólikterdi súırep qaýipsiz jerge alyp shyqqan, dep habarlaıdy QazAqparat tilshisi.
Báıdibek aýdany Aǵybet aýylynda ornalasqan Muzbel asýynda «Mersedes» markaly kólik qalyń qardan júre almaı qalǵan.
Sonyń saldarynan jolda keptelis boldy. Borandy túni jolda qalǵan jolaýshylar tártip saqshylarynyń kómegimen qaýipsiz aımaqqa shyǵarylǵan.
Ýchaskelik polıtsııa ınspektorlary, polıtsııa aǵa leıtenanty Baǵdat Quraq pen polıtsııa aǵa leıtenanty Erbolat Qydyráli «Nıva» markaly qyzmettik kóligindegi arnaıy quraldardy paıdalana otyryp, qar qursaýynda qalǵan kólikterdi súırep, kómek bergen.
Osylaısha júrgizýshi men onyń jolaýshylaryn qaýipsiz aımaqqa ótkizgen.
Óz kezeginde Sozaq aýdanynyń turǵyny polıtseılerdiń janashyrlyǵyna rızashylyǵyn bildirip, alǵysyn aıtty.
«Munda qydyryp kelgen edik. Endi elimizge, Sozaqqa qaıtýǵa shyqqanbyz. Jolda kóligim qarǵa tyǵylyp qaldy. Qaıta dál ýaqytynda polıtseıler kelip kómek berdi»,-deıdi jolaýshy.
Túrkistan oblysynyń polıtseıleri azamattarǵa saq bolýdy jáne jol júrý erejelerin buzbaýdy eskertedi.
Sondaı-aq, júrgizýshilerge aýa raıy nashar, boran bolǵan kezinde jolǵa shyǵýdan bas tartýǵa keńes beredi.
