Báıdibekte qoıshy ózine senip tapsyrylǵan 60 bas usaq maldy satyp jibergen
BÁIDІBEK. QazAqparat - Túrkistan oblysynyń polıtseıleri quny 2 mıllıon teńgeden asatyn maldy ysyrap etken malshyny ustady, dep habarlaıdy QazAqparat oblystyq polıtsııa departamentine silteme jasap.
Túrkistan oblysy polıtsııa departamentine qarasty Báıdibek APB kezekshi bólimshesine jergilikti turǵynnan aryz túsedi. Aryzdanýshy baqtashyǵa senip tapsyrylǵan 600-ge jýyq usaq malynyń ishinen 60 bas malynyń joq ekenin jetkizedi.
«Atalǵan aryz tirkeýge alynyp, QR Qylmystyq kodeksiniń 189-baby boıynsha qylmystyq is qozǵaldy. Aýdandyq polıtsııa bóliminiń tájirıbeli polıtseıleri birden baǵyt alyp, tekserýdi bastap ketti. Aýyl-aımaqtyń barlyq jaıylym jerlerine tintý júrgizip, kórgen-bilgen turǵyndardan suraq-jaýap alyndy, sonymen qatar mal bazarlar men mal tasymaldaıtyn kólikter tyńǵylyqty tekserildi. Tártip saqshylary baqtashynyń ózine senip tapsyrylǵan usaq maldy jymqyryp, mal ıesine 2 mıllıon teńgeden astam shyǵyn keltirgenin anyqtaıdy» delingen habarlamada.
Tergeý barysynda belgili bolǵandaı, baqtashy ózine senip tapsyrylǵan maldy birtindep, ıesine baıqatpaı sata bastaǵan. Satqan aqshany óz qajetine jumsaǵan. Kúdikti búgingi tańda eshqaıda ketpeý týraly qolhat jazdy. Ol buryn sotty bolmaǵan.
Qazirgi tańda tergeý amaldary jalǵasyp, kúdiktiniń budan da basqa qylmystarǵa qatysy bar-joǵy tekserilýde.
Óz kezeginde Túrkistan oblysynyń polıtseıleri mal jaıylymynda maldy qaraýsyz qaldyrmaýǵa keńes beredi. Sondaı-aq baqtashyǵa senip tapsyrylǵan tórt túlikti de jıi qadaǵalap turǵan jón.
«Tórt túligińiz joǵalsa nemese urlansa, ýaqyt joǵaltpaı shuǵyl túrde polıtsııanyń «102» nómirine habar berińiz. Bul qylmyskerlerdi izin sýytpaı quryqtaýǵa kómektesedi» dep eskertedi polıtsııa departamenti.
