Báıdibekte kópsalaly sport kesheni paıdalanýǵa berildi

ShAıAN. QazAqparat - Túrkistan oblysy Báıdibek aýdanynda kópsalaly sport kesheni paıdalanýǵa berildi, dep habarlaıdy QazAqparat óńirlik kommýnıkatsııa qyzmetine silteme jasap.

Túrkistan oblysynyń Báıdibek aýdanynda bıznestiń áleýmettik jaýapkershiligi tetigi aıasynda qyrýar tirlik atqarylýda. Sondaı ıgi isti aýdandaǵy qus sharýashylyǵymen aınalysyp otyrǵan Birikken Arab ámirliginiń kompanııasy iske asyryp otyr. Atalǵan kásiporyn óz qarajatyna aýdan ortalyǵy – Shaıan eldimekeninen sý jańa zamanaýı úlgidegi sport kesheni qurylysyn aıaqtap, ótken jyly el ıgiligine tapsyrǵan bolatyn.

Bul keshenniń qurylysyna 1 mlrd teńge jumsalypty. Munda 1 basseın men tennıs korty jáne 5 sport alańshasy bar. Qazir atalǵan sport kesheni Túrkistan oblystyq №3 olımpıada rezerviniń mamandandyrylǵan balalar men jasóspirimder sport mektebiniń ıeligine tabystalǵan. ıAǵnı barlyq qujattary rásimdelip, atalǵan mekteptiń menshigine ótkizilgen.

«Zamanaýı úlgidegi sport keshenine biz ótken jyldyń mamyr aıynda qonys aýdardyq. Sodan beri munda ornalasyp, barlyq qujattaryn zańdastyryp, ózimizdiń menshigimizge aldyq. Aldaǵy ýaqytta munda júzý, erkin kúres, taekvando, tennıs syndy úıirmeler ashylatyn bolady. Barlyq qyzmet tegin túrde kórsetiledi. Sondaı-aq, munda olımpıada rezervine qarasty sportshylar oqý-jattyǵý jumystaryn júrgizedi», – deıdi Túrkistan oblystyq №3 olımpıada rezerviniń mamandandyrylǵan balalar men jasóspirimder sport mektebiniń dırektory Shadııar Qondybaev.

Mundaı zamanaýı sport keshenderi ázirge oblysymyzdyń ózge aýdandarynda joq. Tek oblys ortalyǵy Túrkistan qalasynda ǵana bar. Sport mektebiniń basshylyǵy jýyrda oblystyq sport basqarmasyna 25 birlik shtat surap, arnaıy ótinim jiberipti. Eger bul usynys qoldaý taýyp jatsa, keleshekte Báıdibek aýdanynan Dmıtrıı Balandın sekildi sý sportynyń sańlaqtary kóptep shyǵatynyna senim mol.