Báıdibekte egistik kólemi 93 myń gektardan asty
BÁIDІBEK. QazAqparat - Túrkistan oblysynyń ákimi jumys saparymen Báıdibek aýdanyna bardy. Ómirzaq Shókeev aýdandaǵy birqatar nysandardy aralap, ondaǵy atqarylyp jatqan jumystarmen tanysty,dep habarlaıdy QazAqparat oblys ákiminiń baspasóz qyzmetine silteme jasap.
Óńir basshysy saparyn Myńbulaq aýyldyq okrýgi Nura eldi mekenindegi «Salıýrbeı Grýp» JShS-nen bastady. Seriktestik maqta egýdi qolǵa alǵan. Jobaǵa saı aq altynnan gektaryna 40 tsentner ónim almaq nıette. Búginde 250 gektarǵa egilgen maqtanyń kútimi jaqsy. Arnaıy qazylǵan uńǵyma arqyly sýarylýda. Onda 10 adam eńbek etedi.
Budan soń oblys ákimi Aqbastaý aýyldyq okrýgi «Qozyke» óndiristik kooperatıvine at basyn burdy. 1992 jyly qurylǵan kooperatıv asyl tuqymdy buqalardyń sanyn kóbeıtýde. Al baptap otyrǵan sıyrlarynyń sany 250-ge jetken. Sondaı-aq, kooperatıvtiń egistik alqabyna maqta, jońyshqa, kúzdik bıdaı egilgen. Munda 18 adam turaqty jumys isteıdi. Óndiristik kooperatıv qajetti tehnıkalaryn da túgendep alǵan.
Ómirzaq Shókeev Boraldaı aýyldyq okrýgi Talap eldi mekenindegi «Tau Alma Bak» JShS-ne de aıaldady. Intensıvti alma baýy 45 ga jerdi alyp jatyr. Alqapta shabdaly men alhory jemis taldary egilgen.
Jalpy, atqarylǵan jumystarǵa qanyqqan oblys basshysy aýdan basshylyǵyna sýarmaly jerlerdiń kólemin ulǵaıtyp, et eksportyn arttyra túsýdi tapsyrdy. Sondaı-aq, sharýalarǵa qajetti memlekettik qoldaý men jer telimderi kedergisiz qoljetimdi bolýyn qadaǵalaýdy júktedi.
Aıta keteıik, aǵymdaǵy jyly aýyl sharýashylyǵy daqyldarynyń egis kólemi Báıdibek aýdany boıynsha 93 myń gektardan assa, oblys kóleminde 823 myń gektar aýmaqqa egildi. Bul ótken jylmen salystyrǵanda 9,8 myń ga artyq. Búgingi tańda 127,4 myń ga masaqty daqyldar jınalyp, 19,8 tsentnerden 252,5 myń tonna astyq jınalǵan. Egin jınaý naýqany jalǵasýda.
