Báıdibek aýdanynda jylyna 70 mln kirpish óndiretin zaýyt salynady
TÚRKІSTAN. QazAqparat - Túrkistan oblysynyń Báıdibek aýdanynda jylyna 70 mln kirpish óndiretin zaýyt salynady, dep habarlaıdy QazAqparat.
Báıdibek aýdanynyń ákimi Baqytbek Tanagózov Irandyq «Faradid Meehan» kompanııasynyń halyqaralyq baılanys jónindegi dırektory Abdolreza Shohýd Talabpen kezdesti.
Irandyq ınvestormen kezdesýde aýdan basshysy aldaǵy ýaqytta yntymaqtastyq aıasynda tyǵyz jumys jasaıtynyn jetkizdi. Óz kezeginde Irandyq Abdolreza Shohýd bastapqyda aýdanǵa 10 mln. AQSh dollary kóleminde ınvestıtsııa salyp, kirpish zaýytyn ashyp, yntymaqtastyq ornatýǵa daıyn ekenin aıtty. Ekijaqty kezdesý nátıjesinde, Báıdibek aýdanynyń ákimdigi men Irandyq «Faradid Meehan» kompanııasy jáne «SPK Túrkistan» AQ fılıaly arasyndaǵy memorandýmǵa qol qoıyldy.
Atalǵan qujat aıasynda Báıdibek aýdany Boraldaı aýyldyq okrýgindegi ındýstrıaldy aımaqtan 5 ga jer bólinip, kirpish zaýytynyń qurylysy júretin bolady.
Aıta keterligi, ırandyq ınvestor aýdannan soǵylatyn zaýytta kirpishtiń 7 túrin shyǵarmaq. Onda 200-ge jýyq adam jumyspen qamtylyp, zaýyttan 1 aıda 4-5 mln. dana, jylyna 60-70 mln. dana kirpish óndiriletin bolady. Irandyq ınvestor aldaǵy jyly qosymsha 10 mln. AQSh dollary kóleminde ınvestıtsııa quıyp, 200 kottedjdik jańa qalashyq salmaq.
