Báıdibek aýdanynda jańadan tóselgen joldardyń sapasyna monıtorıng júrgizildi

BÁIDІBEK. QazAqparat – Túrkistan oblysynyń Báıdibek aýdanynda jańadan tóselgen joldarǵa monıtorıng júrgizildi. Atalǵan shara QR Sybaılas jemqorlyqqa qarsy is-qımyl agenttiginiń Túrkistan oblysy boıynsha departamenti «Sapaly jol» jobalyq keńsesi aıasynda uıymdastyryldy, dep habarlaıdy QazAqparat tilshisi.

Joldyń sapasyn zerdeleý jumystaryna oblystyq departamenti basshysynyń birinshi orynbasary Mıras Qarǵabaı men departamenttiń aǵa ofıtseri Aqtóre Talǵatuly, Báıdibek aýdany ákiminiń orynbasary Aıken Temir men oblystyq jolaýshylar kóligi jáne avtomobıl joldary basqarmasy basshysynyń orynbasary M.Sansyzbaıuly qatysty.

Oǵan arnaıy monıtorıng tobynyń músheleri men Báıdibek aýdanynyń ákimdigi, aýdandyq Nur Otan partııasy fılıalynyń sarapshylary men, oblystyq «Ulttyq jol aktıvteri sapasy ortalyǵynyń» mamandary men jaýapty merdiger kompanııanyń basshylary, sondaı-aq aýyl turǵyndary shaqyryldy.

Shara aıasynda Báıdibek aýdanyndaǵy memlekettik bıýjdet qarjysy esebinen salynǵan oblystyq jáne aýdandyq mańyzy bar joldardyń sapasyna keshendi tekserý júrgizildi. Qoǵamdyq baqylaý jumystarynyń barysynda Báıdibek aýdanyna qarasty Shaldar jáne Báıdibek ata aýylyndaǵy jol qurylysynyń talaptary tolyq tekserilip, kóshpeli jol zerthana kóligi jańadan tóselgen asfalt beton jamylǵysynan synama aldy. Bir kúndik zerdeleýdiń nátıjesinde, «Ekpindi – Shaıan» oblystyq deńgeıdegi jáne Shaldar aýyly aýdandyq mańyzy bar joldyń tóselimi smetalyq qujatqa saı keletini anyqtalǵan. Al, Báıdibek ata aýylyndaǵy joldyń sapasy talapqa saı kelmeıtini anyqtaldy. Jańadan salynǵan joldardan birqatar aqaý baıqaǵan sala mamandary anyqtalǵan kemshilikter boıynsha merdiger mekemelerge akt jasap, kompanııa basshylaryna qaıta jóndeýden ótkizý jóninde usynys bildirdi.

Aıta ketsek, aldaǵy ýaqytta Túrkistan oblysyna qarasty barlyq aýdan-qalalardyń joldary turaqty baqylaýǵa alynyp, monıtorıng jumystary aýdan turǵyndarynyń aryz-shaǵymy negizinde júıeli túrde júrgizilip turatyn bolady.