Báıdibek aýdanynda jańadan salynǵan kópqabatty úı paıdalanýǵa berildi
TÚRKІSTAN. QazAqparat – Túrkistan oblysy Báıdibek aýdanynda jańadan salynǵan kópqabatty úı paıdalanýǵa berildi, dep habarlaıdy QazAqparat tilshisi.
Myńbulaq aýyldyq okrýginiń ortalyǵynda qurylysy aıaqtalǵan 10 páterli turǵyn úıge jas qyzmetkerler men úıi apatty jaǵdaıdaǵy jáne turmysy tómen kópbalaly otbasylar qonystandy.
Saltanatty sharaǵa arnaıy qatysqan Báıdibek aýdanynyń ákimi Baqytbek Tanagózov úı kezeginde turǵan azamattarǵa jańa páter kiltterin tapsyryp, olarǵa izgi tilegin jetkizdi. Jańadan salynǵan kópqabatty úıdiń jobasy tıisti talaptarǵa saı júrgizilgen. Onda jatyn bólmelermen qatar as úıi, ájethanasy men jýynatyn bólmesi bar.
Aıta keteıik, atalǵan aýdandaǵy 3 aýyldyq okrýgte jas qyzmetshiler men az qamtylǵan kópbalaly otbasylarǵa arnap kópqabatty 3 turǵyn úıdiń qurylysy júrgizilgen. Bıyl qalǵan aýyldyq okrýgterdegi qurylysy aıaqtalǵan eki turǵyn úıge jas qyzmetkerler men turmys jaǵdaıy tómen, kópbalaly 20 otbasy qonystanady dep josparlanyp otyr.
