Báıdibek aýdanynda taǵy bir sport kesheni ashyldy - OQO
ShYMKENT. QazAqparat - Ońtústik Qazaqstan oblysy Báıdibek aýdanynda taǵy da bir sport kesheni ashyldy. Jańa nysan Júzimdik aýylynda boı tiktedi. Seksen tútini bar alaqandaı aýyldaǵy balalar endi qysy-jazy sportpen shuǵyldana alady. Júzimdiktegi jurtshylyqtyń qýanyshy sheksiz.
El Táýelsizdiginiń 25 jyldyǵy qarsańynda aýylda aýyz toltyryp aıtarlyqtaı jańalyq bar. Qaraýsyz qalǵan eski sport zalyna 25 mln. teńge jumsalyp, qaıta jan bitti. Keshenge jylý júıesi júrgizilip, sportshylar jýynyp-shaıynatyn arnaıy bólmelermen jasaqtaldy. Sonymen qatar, buqaralyq sportty damytý maqsatynda jabyq sport alańshalary ashyldy. Bul nysan «Bal Tekstıl» JShS-i demeýshiligimen salyndy. Otandyq ónim - kilemdi Eýropa naryǵyna shyǵaryp úlgergen fabrıka dırektory Talǵat Ysqaqov - osy aýyldyń týmasy. Metsenat buǵan deıin Júzimdiktegi mektepke kólik syılap, aýyldyǵy meshitti kúrdeli jóndeýden ótkizgen. Endi, balalardyń bolashaǵy úshin sport keshenin jabdyqtap, aýdannyń kommýnaldyq menshigine ótkizip otyr. Aıtqandaı, sport kesheniniń saltanatty ashylý rásimi oblystyq týrnırmen bastaldy. Voleıbol men toǵyzqumalaqtan jarys uıymdastyryldy.
Sonymen qatar, aýdannyń namysyn respýblıkalyq dodalarda qorǵap júrgen sańlaq sportshylarǵa tartý jasaldy. Báıdibek aýdanynda elim dep emirengen erler kóp. Tıisinshe, eli de azamattaryn ardaq tutady. Aýylyn kórkeıtýge at salysqan Talǵat Ysqaqovqa «Báıdibek aýdanynyń qurmetti azamaty» ataǵy berildi. Óńir basshylyǵynan arnaıy barǵan ókil jomart kásipkerge oblys ákiminiń alǵys hatyn tabys etti.
