Báıdibek aýdanynda probatsııa úıi ashyldy
BÁIDІBEK. QazAqparat – Túrkistan oblysy, Báıdibek aýdanynyń ortalyǵy Shaıan aýylynda probatsııa úıi ashyldy, dep habarlaıdy QazAqparat tilshisi.
Saltanatty sharaǵa aýdandyq prokýratýrasynyń prokýrory N.Myrzakerim men aýdandyq probatsııa qyzmetiniń top basshysy T.Jumabekov, kásipkerlik palatasynyń aýdandyq fılıalynyń dırektory men aýdan ákimdiginiń derbes bólimderi, mekeme basshylary men mamandary qatysty.
Probatsııa úıinde buryn sottalǵan azamattar úshin aýdandyq jumyspen qamtý jáne áleýmettik baǵdarlamalar bólimi, bilim, sport, kásipkerlik, kóshi-qon polıtsııasy, densaýlyq saqtaý jáne qylmystyq atqarý júıesiniń aýdandaǵy bólimderiniń zańgerleri men mamandary qajettilige qaraı áleýmettik-quqyqtyq kómek kórsetetin bolady.
Sonymen qatar, probatsııalyq esepte turǵan azamattar ózderine kerek kómek túrleri boıynsha eńbekke ornalasý, mamandyq meńgerý, kásipkerlikti qoldaý úshin nesıe alý, orta bilim alý, qujattandyrý, medıtsınalyq kómek, quqyqtyq kómek jáne ózge de kómek túrlerin ala alady. Atalǵan ortalyqtyń mamandary búginnen bastap-aq tirkeýde turǵan birqatar azamattarǵa quqyqtyq keńesterin berdi.
