Báıdibek aýdanynda muǵalimniń úıinen 9 kg marıhýana tabyldy
BÁIDІBEK. QazAqparat - Túrkistan oblysy Báıdibek aýdanynda muǵalimniń úıinen 9 keli marıhýana tabyldy. Tarıh pániniń muǵalimi asa iri kólemdegi esirtkini 9 paketke salyp, úıiniń aldynda ornalasqan saraıdyń ishine jasyryp qoıǵan, dep habarlaıdy QazAqparat tilshisi.
Túrkistan oblystyq PD baspasóz qyzmetiniń málimetinshe, atalǵan qylmys «Kóknár-2019» jedel-profılaktıkalyq is-sharasy barysynda ashylǵan. Báıdibek APB-ne aýdandyq mektepterdiń birinde tarıh páninen sabaq beretin jergilikti turǵynnyń óz úıinde esirtki zatyn asa iri mólsherde zańsyz saqtaıtyny týraly habarlama kelip túsken. Habarlama barysynda tez arada Túrkistan oblysy PD EBQІQB, KPB, Báıdibek APB tájirıbeli polıtseılerinen tergeý toby qurylyp, júıeli túrde arnaıy jedel izdestirý is-sharalaryn júrgizedi.
Nátıjesinde polıtseıler kúdikti retinde Báıdibek aýdanyndaǵy mektepterdiń birinde jumys isteıtin ustazdy ustaǵan. Kúdikke ilingen azamattyń úıinen tabylǵan esirtki zatyna uqsas zattyń keptirilgen marıhýana ekeni anyqtaldy.
«Keptirilgen marıhýananyń jalpy qaptaýsyz salmaǵy - 9 keliden astam. Atalǵan jaıt QR QK 296-baby 4-bóligi boıynsha tirkelip, sotqa deıingi tergep-tekserýdiń biryńǵaı tizilimine engizildi. Kúdikti qamaýǵa alyndy. Sotqa deıingi tergep-tekserý amaldary júrgizilýde. Qazirgi tańda Túrkistan oblysy polıtseıleri kúdiktiniń asa iri mólsherdegi esirtki zatyn ózinde qandaı maqsatpen saqtaǵanyn anyqtaýda» delingen habarlamada.
