Báıdibek aýdanynda 90 jyldyq tarıhy bar bilim ordasy mereıtoıyn toılady
BÁIDІBEK. QazAqparat – Túrkistan oblysy Báıdibek aýdanynda Ǵanı Muratbaev atyndaǵy jalpy orta mektep 90 jyldyq mereıtoıyn toılady. Qazaqtyń birtýar azamattary oqyǵan bilim oshaǵynyń saltanatty jıynynda ár jyldarda eńbek etken ustazdar men bilim alǵan túlekter bas qosyp, mektep aýlasynda «Ustazdar alleıasy» ashyldy, dep habarlaıdy QazAqparat tilshisi
Tarıhqa kóz júgirtsek alǵashynda bastaýysh odan keıin jeti jyldyq, 1965 jyly orta mektepke aınalǵan bilim oshaǵyn 90 jyl ishinde 15-ke jýyq dırektorlar basshylyq jasaǵan. Bolashaq urpaqqa sapaly bilim men sanaly tárbıe bergen 100-ge jýyq ardager ustaz búginde eńbekteriniń zeınetin kórip otyr. Bulardyń árqaısynyń osy mektepte ózindik qoltańbasy bar. Shaqpaq eldi mekenindegi irgeli bilim ordasynda ótken jıynǵa aýdan ákimi B.Tanagózov qatysyp, quttyqtaý sóz sóıledi. Bilim uıasynyń jetken jetistikterine toqtalyp, birqatar azamattardy arnaıy alǵys hattarmen marapattady.
«Sizderdi qazaq jastarynyń jalyndy jetekshisi bolǵan Ǵanı Muratbaevtiń esimin ıelengen irgeli bilim ordasynyń 90 jyldyq mereıtoıymen shyn júrekten quttyqtaımyn! Bul mektep 90 jylda talaı shákirtti qanattandyryp, úlken ómirge ushyryp keldi. Qazaqta «Ustazy jaqsynyń ustamy jaqsy» degen naqyl sóz bar. Bul mektepte talaı tájirıbeli ustazdar eńbek etip, bilimniń dińgegin qalyptastyrdy. Osyndaı ustazdardyń arqasynda talaı túlekter bıik belesterdi baǵyndyrdy. 1929 jyly irgesi qalanǵan bilim oshaǵynan kúni búginge deıin 4 myńǵa jýyq shákirt túlep ushqan. Alyptardy shyǵarǵan bul bilim uıasy, halqynyń qamyn jeıtin áli talaı urpaq tárbıeleıtinine bek senimdimin»,- dedi aýdan ákimi.
Mektep túlekteriniń qatarynda Sovet Odaǵynyń batyry, akademık, professor, Qazaq Keńestik Sotsıalıstik Respýblıkasynyń Joǵarǵy Keńesiniń depýtattary, aqyn-jazýshylar, tipti Qazaqstan Ánuranynyń resmı túrdegi tuńǵysh oryndaýshysy Talǵat Kúzenbaevtar bar. Sondaı-aq, ómirimen de ónerimen de qazaqqa aınalǵan, qazaq dástúrli án ónerin nasıhattaýshy ánshisi, dombyrashy Tatıana Býrmıstrova men tanymal sazger Jarylqasyn Dáýlet, aýdan ákimderi men oblystyq, aýdandyq máslıhat depýtattary, kásipkerler jáne basqa da kóptegen qoǵam qaıratkerleri men mádenıet sańlaqtary osy jerde bilim alǵan. Aýyl turǵyndary bul azamattardyń osy Shaqpaq eldi mekenindegi mekteptiń túlekteri ekenin maqtan etedi.
