Báıdibek aýdanynda 36 mal tasqyn sý astynda qaldy
TÚRKІSTAN. QazAqparat – Tasqyn sýdyń saldarynan Báıdibek aýdanynda 36 usaq mal sý astynda qaldy. Bul týraly Túrkistan oblysy Tótenshe jaǵdaılar departamenti bastyǵynyń orynbasary Baqytjan Zaparov málimdedi, dep habarlaıdy QazAqparat tilshisi.
Baqytjan Zaparovtyń aıtýynsha, qazir Túrkistan oblys aýmaǵynda jaǵdaı turaqtalǵan. Sýdyń kelýi de toqtaǵan. Degenmen tasqyn sýdan áli de qaýip bar.
«Óńirdegi bes aýdanda 20 eldi mekendi sý aldy. 27 kóshe men 234 úıdiń aýlasyna sý kirdi. Jergilikti atqarýshy organdar men TJD qyzmetkerlerimen 204-ten astam turǵyn qaýipsiz jerge kóshirildi. 790 usaq mal qutqaryldy. Báıdibek aýdanynda 36 mal qyryldy degen aqparat tirkeldi. Jalpy birneshe aıdan beri óńirde júrgizilgen aldyn alý jumystarynyń nátıjesinde tasqyn sýdan keler alapat apatqa jol berilgen joq. Saýranda 4 evakýatsııalyq ortalyq uıymdastyryldy. Departamentte shtab quryldy. Oblys aýmaǵynda sý seıilgenmen, áli de qaýip bar dep esepteımiz. Taýly aýmaqtaǵy Tólebı, Qazyǵurt aýdandarynda áli de qar bar. Jańbyr jaýsa osyndaı tótenshe jaǵdaı oryn alýy múmkin» - dedi ol.
Tótenshe jaǵdaı mamandarynyń aıtýynsha, óńirge 7 saǵattyń ishinde jaýǵan jańbyrdyń kólemi 10 kúndik mólsherden asyp túsken. Sonymen qatar 2-4 aqpan kúnderi taýly aımaqtarda jańbyr, qar jaýýy yqtımal. Sondyqtan árbir aýdan, qalada sý tasqynynyń aldyn alý jumystary júrip jatyr jáne sý basý qaýpi bar aımaqtar men sý nysandarynda 24 saǵattyq kezekshilik uıymdastyrylǵan.
Eske sala keteıik, 2 aqpanda Kentaý, Túrkistan qalalarynda jáne Báıdibek, Saýran, Ordabasy aýdandarynda jaýyn-shashynnan kósheler men aýlalardy sý basyp jatqanyn habarlaǵan edik.
Tasqyn sý Saýran aýdanyndaǵy eldi mekenderge qaýip tóndirip tur. Sý tasqynyna baılanysty Saýranda mektep oqýshylary onlaın oqýǵa kóshti jáne 7 balabaqsha jumysyn toqtatty.
Túrkistan oblysynyń úsh aýdanynda 6 kósheni sý basqan.
Óńirde kóligimen tasqyn sý ortasynda qalyp qoıǵan turǵyndar qutqaryldy. Túrkistan oblysynyń ákimi tasqyn sý kirgen eldi meken turǵyndarymen kezdesti.
Biz sondaı-aq Kentaý qalasy men Saýran aýdanynda tótenshe jaǵdaı jarııalanýy múmkin ekenin jazdyq.
4 eldi mekende sý burý jumystary júrgizilip jatyr, turǵyndar úshin «jedel jeli» iske qosyldy.
Qazgıdromet sınoptıkteri Túrkistan oblysynda búgin de jaýyn jaýyp, ózenderde sý deńgeıi kóteriletinin eskertti
Basty foto: Túrkistan oblysy TJD
Foto: Túrkistan óńirlik kommýnıkatsııa qyzmeti
