Baıden Trampqa jasalǵan qastandyqqa baılanysty málimdeme jasady
ASTANA. KAZINFORM – Djo Baıden Aq úıdiń burynǵy basshysy jáne respýblıkalyqtar atynan AQSh prezıdenttigine kandıdat Donald Tramptqa jasalǵan qastandyq áreketine baılanysty Amerıka halqyna úndeý jasady. Prezıdenttiń Sopaqsha kabınette jazǵan málimdemesinde ol amerıkalyqtardy saıasattaǵy zorlyq-zombylyqtan bas tartýǵa shaqyrdy, dep habarlaıdy VVS.
«Biz saıasatymyzda temperatýrany tómendetýimiz kerek. Mundaı zorlyq-zombylyqtyń normaǵa aınalýyna jol berilmeýi tıis. Elimizdegi saıası rıtorıka óte qyza tústi. Ony salqyndatatyn ýaqyt keldi. Muny isteý – bárimizdiń jaýapkershiligimiz», - dedi Baıden.
Ol saıasat «beıbit pikirtalas alańy» bolýy kerek ekenin jáne zorlyq-zombylyq eshqashan jaýap bola almaıtynyn aıtty. Prezıdent Trampqa tezirek saýyǵyp ketýin tilep, mıtıngi kezinde onyń otbasy múshelerin oqtan qorǵaǵan 50 jastaǵy Korı Komperatoreni batyr dep atady.
Join me as I address the nation from the Oval Office. https://t.co/0lbRNEt6OH
— President Biden (@POTUS) July 15, 2024
Bul Baıdenniń prezıdenttik kezeńdegi Sopaqsha kabınetten jasaǵan úshinshi úndeýi boldy. Mundaı sóz sóıleý salystyrmaly túrde sırek ótip, ádette eń mańyzdy oqıǵalarǵa arnalady. Baıden buǵan deıingi úndeýin ótken jyldyń qazan aıynda HAMAS-tyń Izraılge shabýylynan keıin jasaǵan.
Buǵan deıin ol 2023 jyldyń maýsymynda AQSh Kongresinen amerıkalyq qaryz shegin ulǵaıtýǵa ruqsat berýdi talap etý úshin ultqa úndeý jasady.
Eske salaıyq, buǵan deıin AQSh-tyń Pensılvanııa shtatynda saılaýaldy aktsııasy kezinde Donald Trampqa qastandyq jasalǵanyn jazǵan bolatynbyz.
Senbi kúni burynǵy prezıdent Donald Trampty óltirmek bolǵan adamnyń 20 jastaǵy Tomas Mettıý Krýks ekeni anyqtaldy.
Qosa ketsek, buǵan deıin Prezıdent Qasym-Jomart Toqaev AQSh saıasatkeri Donald Trampqa jasalǵan qastandyqty qatań aıyptaıtynyn málimdegen edi.
