Baıden Netanıahýdyń Gaza sektoryndaǵy áreketin synǵa aldy

ASTANA. KAZINFORM — AQSh prezıdenti Djo Baıden 9 naýryzda amerıkalyq MSNBC telearnasyna bergen suhbatynda Izraıldiń Gaza sektoryndaǵy jazyqsyz adamdardyń ólimine ákelgen áreketin qatelik dep sanaıtynyn aıtty. Ol sóz arasynda atysty toqtatýǵa shaqyrdy. Bul týraly DW jazdy.

«Izraıl premer-mınıstri Bınıamın Netanıahý óz elin qorǵaýǵa quqyly, biraq Izraıl memleketiniń Gaza sektorynda HAMAS lańkestik uıymyna qarsy soǵysy kezinde jazyqsyz adamdardyń ómirin qorǵaý úshin kóbirek áreket etýi kerek», - dedi Baıden. 

AQSh prezıdenti 1,5 mıllıonǵa jýyq palestınalyq bosqyndar pana tapqan Rafah qalasyna Izraıl qorǵanys armııasynyń (IDF) shabýyl jasaý múmkindigi týraly aıta otyryp, bul qadamnyń óreskel qadam ekenin atap ótti.

Taıaý Shyǵystaǵy qaqtyǵystyń shıelenisýi 2023 jyldyń 7 qazanynda Eýropalyq Odaq pen AQSh terrorıstik uıym dep tanyǵan HAMAS radıkaldy ıslamdyq qozǵalysy Izraılge keń aýqymdy shabýyl jasaǵannan keıin bastaldy. Terrorıster Izraılge jappaı zymyran shabýylyn jasady jáne 1400 adam sol shabýyldyń qurbany boldy. Sondaı-aq sodyrlar 200-den astam adamdy kepilge alyp, Gaza sektoryna alyp ketken. 

Izraıl jaýap retinde HAMAS-qa soǵys jarııalady. El armııasy HAMAS bıligindegi osy tyǵyz qonystanǵan Palestına aımaǵyna jappaı soqqy berip, qurlyqtaǵy áskerı operatsııany da júrgizýde. HAMAS baqylaýyndaǵy Densaýlyq saqtaý mınıstrliginiń málimetinshe, Gaza sektorynda qazirdiń ózinde 30 myńǵa jýyq adam qaza tapqan.