Baıden qýyqasty bezi qaterli isigin emdeý kýrsyn aıaqtady

ASTANA. KAZINFORM — Mamyr aıynda qýyqasty bezi qaterli isiginiń agressıvti túrine shaldyqqan AQSh-tyń burynǵy prezıdenti Djo Baıden sáýlelik terapııa kýrsyn aıaqtady, dep habarlaıdy NBC News.

82 jastaǵy Baıden bes apta boıy «sáýlelik terapııa men gormondyq emdeýden» ótti.

Burynǵy prezıdent qosymsha emdelýdi nemese kútimdi qajet ete me, ol belgisiz. 

Ótken aıda Baıdenge teri qabattaryn alyp tastaýdy qamtıtyn, Mos ádisi boıynsha ota dep atalatyn teriniń qaterli isikti emdeý kýrsy ótkizildi. 

Eske sala ketsek, dárigerler 16 mamyr kúni AQSh-tyń eks-prezıdenti Djo Baıdennen qýyqasty bezi qaterli isiginiń agressıvti túrin anyqtady.