Baıden kezinde taǵaıyndalǵan: AQSh 29 eldegi dıplomattaryn keri qaıtaryp jatyr
ASTANA. KAZINFORM — AQSh Memlekettik departamenti 29 eldegi elshilerine ókilettiginiń aıaqtalǵany týraly hat joldady. Dıplomattardyń basym bóligi Djo Baıden prezıdent bolǵan kezeńde taǵaıyndalǵan. Endi olardyń ornyna Donald Trampqa barynsha jaqyn sheneýnikter taǵaıyndalmaq, dep jazady DW.
Donald Tramp ákimshiligi ondaǵan joǵary laýazymdy dıplomatty elshilikterdegi qyzmetinen keri qaıtaryp jatyr. Olardyń kópshiligi Baıden tusynda taǵaıyndalǵan, al Aq úı olardy Tramptyń saıası baǵytyn qoldaıtyn kadrlarmen almastyrýdy josparlap otyr.
Basylymnyń málimetinshe, jeltoqsan aıynyń ortasynda 29 eldegi dıplomatııalyq ókilderge qańtar aıynda ókilettigi aıaqtalatyny týraly hattar jiberilgen. Eń kóp keri shaqyrý Afrıka elderine tıesili. Atap aıtqanda, Býrýndı, Kamerýn, Kabo-Verde, Gabon, Kot-d’Ivýar, Madagaskar, Mavrıkıı, Nıger, Nıgerııa, Rýanda, Senegal, Somalı jáne Ýgandadaǵy elshiler aýystyrylady.
Sondaı-aq ózgerister Azııa–Tynyq muhıty óńirin (Fıdjı, Laos, Marshall araldary, Papýa – Jańa Gvıneıa, Fılıppınder, Vetnam), Eýropany (Armenııa, Soltústik Makedonııa, Chernogorııa, Slovakııa) jáne Aljır, Mysyr, Nepal, Shrı-Lanka, Gvatemala men Sýrınamdy qamtıdy.
AQSh Memlekettik departamenti elshilerdi keri shaqyrýǵa qatysty pikir bildirýden bas tartyp, bul kez kelgen prezıdent ákimshiligi úshin qalypty rásim ekenin atap ótti.
Amerıkalyq elshilerdiń qyzmet merzimi prezıdenttiń sheshimimen 3–4 jyldy quraıdy. Sondaı-aq keri shaqyrylǵan dıplomattarǵa Vashıngtonda basqa qyzmetter usynylatyny aıtyldy.
Vedomstvo prezıdent Tramptyń AQSh elshilerin Aq úıdiń jáne «Amerıka bárinen buryn» qaǵıdatyna saı syrtqy saıasatty qoldaıtyn tulǵalardan taǵaıyndaýǵa quqyǵy bar ekenin eske saldy.
Bul — 2025 jyly dıplomattardy keri shaqyrýdyń alǵashqy tolqyny emes. Prezıdent qyzmetine kiriskennen keıin Donald Tramp Memlekettik departamentti qaıta qurylymdaý týraly jarlyqqa qol qoıǵan. Sonyń nátıjesinde birqatar elshiler keri shaqyrylyp, klımattyń ózgerýi, adam quqyqtary, demokratııalyq ınstıtýttar men genderlik teńdik máselelerimen aınalysqan dıplomatııalyq qyzmetkerler jumystan bosatylǵan.
Basylymnyń málimetine sáıkes, 2025 jyldyń jazynda Memlekettik departament amerıkalyq dıplomattarǵa qyzmet etip júrgen elderdegi demokratııa deńgeıin kópshilik aldynda baǵalaýǵa tyıym salǵan.
Buǵan deıin Tramp Baıden avtopero arqyly qol qoıǵan barlyq jarlyqtardyń kúshin joıatyny habarlanǵan bolatyn.