Baıden federaldy aıyptar boıynsha ólim jazasyna kesilgenderge raqymshylyq jasady

ASTANA. KAZINFORM – Donald Tramp qańtarda prezıdenttik qyzmetine kiriskende bul sheshiminiń kúshin joıa almaıdy, dep habarlaıdy VVS.

Prezıdent Baıden federaldy zańdar boıynsha sottalyp, ólim jazasyna kesilgen qyryq tutqynnyń basym kópshiliginiń jazasyn jeńildetti.

Olar endi ómir boıy túrmede otyrady, biraq merziminen buryn bosatý quqyǵy berilmeıdi. Donald Tramp qańtar aıynda qyzmetine kiriskende bul sheshimniń kúshin joıa almaıdy.

– Men qoǵamdyq qorǵaýshy, Senattyń Sot-quqyqtyq komıtetiniń tóraǵasy, vıtse-prezıdent jáne qazir prezıdent retindegi ar-ojdanym men tájirıbemdi esepke ala otyryp, federaldy deńgeıde ólim jazasyn qoldanýdy toqtatýymyz kerek ekenine senimdimin, – dedi Baıden.

Ólim jazasyna qarsy bolǵandar jańadan saılanǵan prezıdent Donald Tramp bul jazany qoldaıtynyn aıtýda. Ol 45-shi prezıdent bolyp saılanǵan sátte shamamen jıyrma jylǵa jýyq úzilisten keıin federaldy ólim jazasyn qaıta qoldana bataǵanyn, el basqaryp turǵan kezde 6 aıda 13 ólim jazasy oryndalǵanyn eske saldy.

Baıdenniń raqymshylyǵyna úsh federaldy ólim jazasyna kesilgen sottalýshylardan basqasynyń bári ilikti. Olardyń arasynda 2013 jyly Boston marafonynda jarylys uıymdastarǵan Djohar Tsarnaev, 2015 jyly Charlstonda toǵyz qara násildi azamatty atyp óltirgen Dılan Rýf jáne 2018 jyly Pıttsbýrgta sınagogaǵa shabýyl jasap, 11 tabynýshyny óltirgen Robert Baýers bar.

Aıta keteıik, Baıden prezıdent kezinde shtattarda 70-ten astam ólim jazasyn oryndalǵan.

Prezıdentter ádette qyzmet merziminiń sońynda keshirim jasaıdy, al demokrattar Baıdendi múmkindigi bolǵan kezde bul ókilettikterdi keńinen paıdalanýǵa shaqyrdy.

Baıden eki qylmystyq is boıynsha sottalǵan jáne úkimdi kútip otyrǵan uly Hanterge de raqymshylyq jasaǵan bolatyn.

Sondaı-aq, buǵan deıin Baıdenniń 39 adamǵa raqymshylyq jasap, 1500-ge jýyq sottalýshynyń jazasyn jeńildetkenin jazǵan edik.