Baıden ákimshiligi Trampqa TikTok-qa tyıym salý múmkindigin beredi

ASTANA. KAZINFORM - Baıden ákimshiligi qoldanýshylardy TikTok jelisinen ajyratatyn shara qoldanýdy josparlap otyrǵan joq, dep jazady ABC News. 

— Bul másele boıynsha bizdiń ustanymymyz anyq: TikTok Amerıkanyń baqylaýymen jumysyn jalǵastyrýy kerek. Zańnyń ınaýgýratsııaǵa bir kún qalǵanda merekelik demalys kúnderi kúshine enetinin eskersek, onyń oryndalýy kelesi ákimshilikke baılanysty bolady, - dedi Aqúı qyzmetkeri.

Zańǵa sáıkes, TikTok 19 qańtarda jabylýǵa mindetti emes. Óıtkeni qoldanba dúkenderi men ınternet-hostıng qyzmetteri zardap shegýi múmkin. Alaıda, Apple, Google jáne Oracle sııaqty tehnologııalyq kompanııalar TikTok qytaılyq «ByteDance» kompanııasyna tıesili bolǵan kezde jaýapkershilikke tartylýy múmkin. Zań Ádilet mınıstrligine bir paıdalanýshyǵa 5 myń dollarǵa deıin aıyppul salý quqyǵyn beredi. Atalǵan qosymshany shamamen 170 mıllıon amerıkalyq paıdalanatynyn eskersek, bul - óte úlken soma.

Zańda prezıdent úsh shartty eskere otyryp, tyıym salýdy birjolǵy merzimge 90 kúnge deıin keıinge qaldyra alady delingen: TikTok óziniń qytaılyq ıesiniń aktıvterin satýdy «júzege asyrý jolynda» turǵanyn kórsetýi kerek. Satý isinde «aıtarlyqtaı progrestiń dáleli» bolýy kerek jáne bul progress «tıisti zańdy kúshi bar kelisimdermen» bekitilýi kerek. 

Qazirgi ýaqytta osy sharttardyń kez kelgeni oryndalǵanyn kórsetetin belgiler joq.

Djo Baıden jáne keıbir Kongress jetekshileri Tik Tok-qa qarsy ýltımatým ByteDance jáne onyń Qytaı úkimetimen baılanysynda qaýipsizdik máseleleri úshin qajet dep málimdedi.

Donald Tramp TikTok-qa birinshi merziminde tyıym salýǵa tyrysty. Biraq sodan beri 2024 jylǵy prezıdenttik naýqan kezinde qosymshany «qutqarýǵa» ýáde berip, kózqarasyn ózgertti. Jeltoqsan aıynda ótken baspasóz máslıhatynda jańa saılanǵan prezıdent jas saılaýshylardy tartýǵa kómektesken qosymshaǵa «júreginde jyly oryn» bar ekenin aıtty. 

Buǵan deıin Tik-Tok Bas dırektory Tszy Chý Shoý dúısenbide Donald Tramptyń ınaýgýratsııasyna qatysa alady dep habarlanǵan bolatyn. 

Esterińizge sala keteıik, Qytaı TikTok-ty Ilon Maskqa satý múmkindigin qarastyryp jatyr.