Baıdarka jáne kanoe esýden QR quramasy Azıadanyń «altynyna» talasady
Qytaıdaǵy Azııa oıyndarynda baıdarka jáne kanoe esýden Qazaqstan quramasynyń músheleri fınalǵa joldama aldy. QazAqparat bul týraly Týrızm jáne sport mınıstrligine silteme jasap habarlaıdy.
Atap aıtqanda, 200 metr qashyqtyqqa kanoede esýden Marııa Brovkova 52.530 ýaqytpen irikteý kezeńinde 1-oryn alyp, fınalǵa shyqty.
500 metr qashyqtyqqa baıdarkada esýden Anastasııa Berezovskaıa 2:06.783 ýaqytpen 2-orynǵa turaqtap, aqtyq kezeńge ótti.
500 metr qashyqtyqqa baıdarkada esýden erler arasyndaǵy komandalyq saıysta Qazaqstan quramasy (Igor Rıashentsev, Andreı Ergýchev, Sergeı Tokarnıtskıı, Bekarys Ramatýlla) 1:28.922 ýaqytpen úshinshi bolyp kelip, sondaı-aq fınalǵa joldama aldy.
Fınal 3 qazan kúni ótedi.
Sondaı-aq qazaqstandyq Bekádil Sháımerdenov sporttyń qurash túrinen tájik atleti Navrýz Karımzodany jeńip, shırek fınalǵa shyqty.
Sháımerdenovke qarsylasyn jeńýge bir mınýttan az ýaqyt qajet boldy. Tájik sportshysy budan ári qarsylyq kórsete almady.
81 keli salmaq sanatyndaǵy ¼ fınalda qazaqstandyq sportshy Taıland ókilimen sheberlik baıqasady.
