Baıdarka men kanoede esý: halyqaralyq Olımpıadalyq komıteti 25 myń AQSh dollar bóldi
ASTANA. KAZINFORM — Qazaqstan UOK prezıdenti Gennadıı Golovkın men bas hatshy Álimjan Aqaev Halyqaralyq kanoe federatsııasynyń (ICF) prezıdenti Tomas Konetsko jáne ICF Atqarýshy komıtetiniń múshesi, para-kanoe komıssııasynyń tóraǵasy Djon Edvardspen kezdesti. Bul týraly UOK jazdy.
Kelissóz barysynda taraptar baıdarka men kanoede esý, slalom jáne para-kanoe baǵyttaryndaǵy yntymaqtastyqty damytý, sportshylar men jattyqtyrýshylardy daıyndaý tájirıbesimen almasý, sondaı-aq ulttyq jáne halyqaralyq jarystar ótkizýge arnalǵan ınfraqurylymdy jetildirý máselelerin talqylady.
Aıta keteıik, Túrkistan qalasynda baıdarka men kanoede esý jarystaryna arnalǵan halyqaralyq deńgeıdegi arna qurylysy aıaqtalýǵa jaqyn. Qala ortalyǵynda ornalasqan nysan álemdik standarttarǵa saı bolady jáne sý tazartý júıesimen jabdyqtalady.
Kezdesýde Qazaqstannyń baıdarka men kanoede esý sportynda halyqaralyq arenadaǵy belsendiliginiń artyp kele jatqany da ataldy. Bıyl maýsym aıynda Qazaqstan UOK Olımpıadalyq yntymaqtastyq aıasynda Continental Athlete Support Grant baǵdarlamasyna qatysý úshin ótinim berdi. Baǵdarlama bir olımpıadalyq tsıkl ishinde tórt sport túrin qoldaýdy qarastyrady.
Osy baǵdarlama aıasynda 2027 jylǵa Qazaqstan quramasyn qarjylandyrý bastamasy kóterildi. Halyqaralyq Olımpıadalyq komıteti 25 myń AQSh dollary kóleminde bıýdjet bekitti. Bul qarjy quramanyń halyqaralyq oqý-jattyǵý jıyndaryna qatysýyn qamtamasyz etýge jumsalady. Onyń ishinde turý, jol shyǵyndary, tamaqtaný, saqtandyrý, vıza alymdary jáne qaıyq jaldaý tólemderi bar.
Halyqaralyq kanoe federatsııasynyń prezıdenti Tomas Konetsko elimizde eskek esý sportyn sapaly damytýǵa zor múmkindik bar ekenin atap ótti.
— Qazaqstanda eskek esý sportyn damytý boıynsha júıeli ári maqsatty jumystar atqarylyp jatyr. Bul baǵytta ósý múmkindigi óte joǵary. Infraqurylymdy turaqty qoldaý men ınvestıtsııalar sportshylardyń deńgeıin arttyryp, olardyń halyqaralyq arenada laıyqty nátıje kórsetýine jol ashady. Áriptestik baılanystardyń keńeıýi Qazaqstannyń sporttaǵy tabystaryna ǵana emes, sonymen birge onyń álemdik sport qaýymdastyǵyndaǵy bedelin nyǵaıtýǵa da septigin tıgizedi dep senemiz, — dedi Konetsko.
Qazaqstan UOK ókilderi bul kezdesýdiń halyqaralyq seriktestermen sport salasyndaǵy dıalogty damytýda mańyzdy qadam bolǵanyn atap ótti.
— Qazaqstan UOK úshin halyqaralyq yntymaqtastyqty damytý — basym baǵyttardyń biri. Biz Halyqaralyq Olımpıadalyq komıtettiń baǵdarlamalary aıasynda sportshylardy qoldap qana qoımaı, qazaqstandyq ulttyq federatsııa ókilderiniń halyqaralyq sport uıymdarynyń basshylyq qurylymdarynda qyzmet etýine de jaǵdaı jasaımyz. Bul elimizdiń álemdik arenadaǵy bedelin arttyryp, sportshylarymyzǵa jańa múmkindikter ashady, — dedi UOK prezıdenti.
Kezdesý qorytyndysynda taraptar ekijaqty baılanystardy keńeıtý jáne nyǵaıtýǵa ortaq qyzyǵýshylyqtaryn bildirdi.
Eske sala keteıik, buǵan deıin Qazaqstan Ulttyq Olımpıadalyq komıtetiniń prezıdenti Gennadıı Golovkın Mońǵolııa Ulttyq Olımpıadalyq komıtetiniń basshysy Batýshıg Batboldtpen kezdesken bolatyn.