«Baıbekten keldim» degen adamǵa Almaty meıramhanasy 500 teńgege túski as beredi
ALMATY. QazAqparat - Almatyda meıramhanasy túski as boıynsha aktsııa jarııalady, dep habarlaıdy QazAqparat tilshisi.
Ol úshin klıentter «Men Baıbekten keldim» kiltsózin aıtýy kerek.
Ony aıtqan adamǵa meıramhanalar 500 teńgege túski as usynady. Aktsııa búgin ǵana bolady.
«Baıbekten keldim» dep aıtyńyz, biz Sizge 500 teńgege bir ystyq tamaq pen ystyq shaı beremiz. Ákim Baýyrjan Baıbek 500 teńgege tamaqtanýǵa bolady dedi emes pe? Biz soǵan saı bolýǵa tyrysyp jatyrmyz! Kelińiz», - dedi meıramhana basshylyǵy Instagramdaǵy paraqshasynda.
Almaty ınternet qoldanýshylary Baıbektiń bul sózin qyzý talqylaýda.
Olardyń kópshiligi 500 teńgege túk kelmeıtinin aıtsa, keıbiri ondaı mekemeler bar ekendigin aıtýda.
«QazAqparat» tilshisi 500 teńgege tamaqtanýǵa bolatyn qaladaǵy birqatar tamaqtaný oryndaryn aralap kórdi.
Barlyǵyna belgili «Ýzbechka» dámhanasynda 500 teńgege birinshi nemese ekinshi ystyq tamaq alýǵa bolady.
«Manty 400 teńge turady, suıyq tamaq 350 teńge. Ekeýin birdeı 500 teńgege ala almaısyz. Jarty portsııa manty alsańyz 240 teńgeńiz ketedi. 300 teńgege úsh túrli garnırmen kotlet alýǵa bolady. Oǵan 1 sháınek shaı alsańyz bolady. Bul 480 teńge bolady. Nemese 2 samsa, 1 sháınek shaı alsańyz bolady. Jarty portsııa palaý men shaınek shaı 520 teńge bolady», - dedi ashana admınıstratory.
«Qaǵanat» ashana jelisinde suıyq tamaqtar 245-405 teńge bolady. Qoıý tamaq 215-1000 teńge turady. Garnır 110 teńge, shaı 85 teńge bolady. 500 teńgege tamaq ishýge bolady.
«Taǵam» ashanalar jelisinde suıyq tamaq 250-450 teńge, qoıý tamaq 100-700 teńge, nan 70 teńge, shaı 70 teńge turady. 
Shipudim káýap pisiretin jelide qoı etiniń káýaby - 370 teńge, qabyrǵadan káýap - 390 teńge. 500 teńgege bul jerde taýyq etinen, úırek etinen, sańyraýqulaqtan jasalǵan káýap alyp jeýge bolady.
Aıta ketý kerek, keshe Almaty ákimi Baýyrjan Baıbek Astanadaǵy baspasóz máslıhaty kezinde devalvatsııadan soń meıramhanalardaǵy baǵalar tómendegenin aıtyp edi.
Onyń aıtýynsha, meıramhanalarda 500 teńgege tamaqtanýǵa bolady.
Búgingi ekskýrsııamyzdan soń Baıbektiń sóziniń jany bar ekendigine kózimiz jetti.
Almatyda 500 teńgege tamaqtanýǵa bolady, biraq oǵan siz toıasyz ba joq pa? Bul basqa suraq.
