Baıbek jóndeý jumystary baıaý júrgeni úshin orynbasaryna sógis jarııalady
ALMATY. QazAqparat - Almaty ákimi Baýyrjan Baıbek qalanyń jol jáne kommýnaldy ınfraqurylymdaryn qaıta jasaý jumystarynyń barysyn tekserdi, dep habarlaıdy QazAqparat tilshisi qalalyq ákimdikke silteme jasaı otyryp.
Almaty ákimi Baýyrjan Baıbek jumys saparymen qalanyń jol jáne kommýnaldy ınfraqurylymdaryn qaıta jasaý jumystaryn tekserý barysynda qala ákiminiń orynbasary Erlan Áýkenovke sógis jarııalady.
Baıbektiń aıtýynsha, Asqarov kóshesi boıymen Ál-Farabı dańǵylynyń batysyna taman uzyndyǵy 3,5 shaqyrym bolatyn jerdegi sý qubyrlary júıesin qaıta jasaý jumystary óte baıaý júrip jatyr.
Naqtyraq, aıtqanda, atalǵan ýchaske boıynsha konkýrsta jeńiske jetken Petropavl qalasynyń «Tıtan Sever» JShS-i osy ýaqytqa deıin nebári 2 shaqyrym jerdiń jumysyn ǵana atqarǵan. Almaty qalasy Energetıka jáne kommýnaldy sharýashylyq basqarmasy qalǵan 1,5 shaqyrym aýmaqtyń jumysy qyrkúıek aıynyń ortasyna taman aıaqtalatynyn aıtty.
Almaty ákimi Baýyrjan Baıbek jumys barysynda jaıaý júrginshilerge basymdyq beretin Panfılov, Jibek joly, Gogol, Qabanbaı batyr kósheleri men «Astana» alańyn, sonymen qatar qalanyń jol jáne kommýnaldy ınfraquryldymdaryn qaıta jasaý jumystaryn tekserdi.
Qala basshysymen kezdesýde bıylǵy jyly 146 shaqyrym jol jóndelip jatqany, 97 myń sharshy metr trotýarlardyń abattandyrylǵany, 42,2 shaqyrym bolatyn aryqtar jelisi men 57 kóshede qaıta jóndeý jumystary júrip jatqany baıandaldy.
Sondaı-aq, bıyl Almatyda 32 shaqyrymnan astam jylý júıesi jańartyldy. «Áıgerim», «Uljan 1,2», «Qarasý», «Aqbulaq», «Darhan», «Qurylysshy», «Ójet», «Trýdovık», «Shańyraq 1,2», «Altyn besik», «Dostyq» jáne basqa yqsham aýdandardaǵy 20 myńnan astam úılerdi qamtamasyz etetin 380 shaqyrymnan astam sý jáne káriz qubyrlary tartylyp jatyr.
Sondaı-aq, Baýyrjan Baıbek Abaı dańǵyly boıyndaǵy Esentaı ózeni arqyly ótetin kópirdi qaıta jasaý jumysyn tekserdi. Jóndeý jumystaryn eki aýysymmen júzge jýyq adam júrgizip jatyr. Ústimizdegi jyldyń 27 tamyzynda kópirdiń soltústik bóligimen kólikterdi ótkizýdi bastaý josparlanǵan. Budan soń qurylysshylar kópirdiń ońtústik bóliginiń jóndeý jumystaryn qolǵa alyp, ony 25 kún ishinde aıaqtamaq.
Almaty ákimi Panfılov, Jibek joly, Gogol, Qabanbaı batyr kósheleri men «Astana» alańyn qaıta jańǵyrtý jumystaryn da tekserip shyqty.
