Baıbek jeke ınvestıtsııalarǵa salynatyn jobalarmen tanysyp shyqty
ALMATY. QazAqparat - Almatynyń Qala qurylysy keńesi 40 mlrd. teńge somasyndaǵy jeke ınvestıtsııalar esebinen salynatyn birqatar jobany maquldady.
Olardyń júzege asyrylýy qurylys kezeńinde 2 myń jumys ornyn jáne nysandar iske qosylǵannan keıin taǵy osynshama vakansııany ashýǵa múmkindik beredi. Jalpy, 100 myń sharshy metr turǵyn aýmaq salynatyn bolady.
Qala qurylysy keńesiniń otyrysy shahar ákimi Baýyrjan Baıbektiń tóraǵalyǵymen ótti. Ákimniń baspasóz qyzmetinen málim etkendeı, barlyǵy 7 joba maquldandy.
Máselen, Alataý aýdanynda 4 gektar aýmaqta «MIZAM» saýda-logıstıkalyq kóterme-bólshektik azyq-túlik ortalyǵy boı kótermek. Ol Parıjdegi Rungis aýylsharýashylyq ónimderiniń kóterme saýda naryǵynyń úlgisi boıynsha jumys isteıtin bolady.
Sondaı-aq, Medeý aýdanynda ǵylymı-zertteý ınstıtýtynyń ǵımaratyn salý jobasy qaraldy. Ǵımarattyń qurylysyna energoúnemdeıtin tehnologııalar men ekologııalyq materıaldar paıdalanylmaq. Tapsyrys berýshiniń ınvestıtsııasy 3 mlrd. teńgeni quraıdy.
Medeý aýdanynda sonymen qatar, mýzykalyq art-ortalyq paıda bolady. Joba boıynsha jaryq ótkizetin jáne kúnnen qorǵaıtyn konstrýktsııalardy qoldaný kózdelgen. Onda 14 mýzykalyq synyp, akt zaly, dybys jazatyn, foto jáne vıdeo, horeografııalyq stýdııalar qarastyrylǵan.
Budan bólek, qalanyń eki aýdanynda úsh turǵyn úı kesheniniń qurylys jobalary qarastyryldy. Taǵy eki turǵyn úı Medeý aýdanynda boı kótermek.
