Baıbek Jańa jyldyń aldynda azyq-túlik baǵasyn tekserdi
ALMATY. QazAqparat - Almaty ákimi Baýyrjan Baıbek qalanyń iri saýda jelisi dúkenderiniń birine baryp, azyq-túlik baǵalarymen tanysty, dep habarlaıdy QazAqparat tilshisi.
Ákim shujyq, maıonez, burshaq, kartop sekildi dástúrli jańajyldyq sebetten tabylatyn azyq-túlik baǵasyna gıpermarket usynǵan jeńildikterge qyzyǵýshylyq tanytty. «Jańa jyl aldynda barynsha jeńildikter jasaýǵa tyrysamyz», - dedi qala basshysyna dúken jetekshiligi. 
Olar ákimge taýar sórelerin kórsetip, baǵalarymen tanystyryp shyqty. Jýrnalıster ákimnen baǵalardyń qanshalyqty qolaıly ekenin suraǵanda, ákim «Bul týraly qalalyqtar aıtsyn» dep jaýap berdi. 
«Biz qoldan kelgenshe jumys istep jatyrmyz, kórdińizder me, órkenıetti saýda keldi - demek turaqty salyqtar, turaqty jalaqy, qalypty sapa bolady. Biz bıyl almatylyq ónimderdiń úlesin 2% arttyrdyq. 2% az bolyp kórinetin shyǵar, biraq Almaty 3 mıllıon halqy bar úlken naryq jáne bul 2% - úlken júıeli eńbekti kórsetip tur, aldaǵy ýaqytta da jumysty jalǵastyra bermekpiz», - dedi Baýyrjan Baıbek.
