Baıbek: Ult sanasynyń jańǵyrýyn maqsat etken bul eńbek - baǵdarlamalyq qujat
ALMATY. QazAqparat - Almaty ákimdiginde Elbasy Nursultan Nazarbaevtyń 12 sáýir kúni «Egemen Qazaqstan» gazetinde jarııalaǵan «Bolashaqqa baǵdar: rýhanı jańǵyrý» maqalasyn taldaýǵa arnalǵan jıynda qala aktıvi bas qosty. Jıynda sóz bastaǵan qala ákimi Baýyrjan Baıbek mańyzdy maqalanyń baǵadarlamalyq mazmunyna erekshe mán berdi, dep habarlaıdy QazAqparat tilshisi.
«Maqala eki kúnniń ishinde ǵylymı, shyǵarmashylyq-ıntellıgentsııa ókilderiniń, ult zııalylarynyń, qalyń jurtshylyq tarapynan keńinen qoldaý taýyp, merzimdi baspasóz jáne áleýmettik jeli paraqshalarynda qyzý talqylanyp jatyr. Ult sanasynyń jańǵyrýyn maqsat etken bul eńbek - baǵdarlamalyq qujat. Úlken eki bólimnen turatatyn maqalanyń ekinshi jartysynda Elbasy kez kelgen jańǵyrýdyń eń aldymen Ulttyq bolmysqa, dástúrdiń zamana synynan súrinbeı ótken ozyǵyna negizdelýin qadap aıtyp otyr», - degen qala ákimi Baýyrjan Baıbek rýhanı jańǵyrý ulttyń óz bolmysynan, mádenıeti men tarıhynan sýsyndaýy, soǵan súıene otyryp iske asýy qajet degen pikir aıtty.
Sonymen qatar, qala ákimi bul ózgerister úrke qarap, tek qana ótkendi jyrlaı berýdiń, jańanyń bárin qısyq dep taýyp, kertarpalyqqa urynýdan ada bolýdy talap etetinin aıtty.
«Maqalada elimizdiń qazirgi tańda jańa tehnologııalarǵa, jańa álemdik saıası ekonomıkalyq ahýalǵa negizdelgen múldem jańa tarıhı kezeńge aıaq basqanyn aıta kele, Elbasy osy tustan súrinbeı ótý, ıaǵnı birtutas ult bolý úshin qandaı qasıetterge ıe bolyp, mindetterdi eńserý qajettigi jóninde oı tolǵaıdy», - dedi Baýyrjan Baıbek qala aktıvimen bolǵan kezdesýde.
